Sıfrlandyrý aıasynda joldaǵy birqatar quqyqbuzýshylyqty anyqtaý ıntegrasııalanǵan aqparattyq júıeler men memlekettik derekter bazalaryn paıdalaný arqyly avtomatty rejımde júzege asyrylyp jatyr, dep jazady Egemen.kz.
Búginde respýblıka boıynsha ákimshilik óndiristerdiń birińǵaı tizilimi júıesimen ıntegrasııalanǵan memlekettik derekter bazalarynyń málimetterin paıdalaný arqyly saqtandyrý polısi joq 5 myńnan astam derek, tehnıkalyq baıqaýdan ótpegen 5,5 myńnan astam derek, qaýipsizdik beldigin taqpaýǵa baılanysty shamamen – 700 quqyq buzýshylyq, sondaı-aq kólik quralyn basqarý kezinde telefon qoldanýdyń 6 deregi anyqtalǵan.
Kólik júrgizý kezinde telefon paıdalaný: Beınebaqylaý kameralary qalaı jumys isteıdi?
Ishki ister mınıstrligi sıfrlyq sheshimder joldaǵy qaýipti áreketterdi der kezinde anyqtaýǵa, yqtımal saldardyń aldyn alýǵa jáne jaýapkershiliktiń bultartpastyǵyn qamtamasyz etýge múmkindik beretinin atap ótti.
«Jolda júrý qaǵıdalary saqtalǵan jaǵdaıda eshqandaı aıyppul sanksııalary qoldanylmaıdy. Bul júıe jazalaý úshin emes, quqyq buzýshylyqtardyń aldyn alý jáne azamattardyń ómiri men densaýlyǵyn qorǵaý maqsatynda engizilgen. Azamattardy zańnama talaptaryna jaýapkershilikpen qarap, saqtandyrý polısiniń bar-joǵyn aldyn ala tekserip, tehnıkalyq baıqaýdan ýaqytyly ótip, jolda júrý qaǵıdalaryn qatań saqtaýǵa shaqyramyz», delingen mınıstrlik taratqan habarlamada.
12 naýryzdan bastap kameralar qandaı zańbuzýshylyqtar úshin aıyppul salady?