Eńbekaqy tóleý, qyzmetke ornalasý kórsetkishi boıynsha erler men áıelder arasyndaǵy ekonomıkalyq teńdikke tolyq qol jetkizý úshin 170 jyl kerek. Bul týraly keshe Búkilálemdik ekonomıkalyq forýmda aıtyldy, dep habarlaıdy Reuters agenttigi.
Búkilálemdik ekonomıkalyq forýmnyń negizin salýshy ári atqarýshy tóraǵasy Klaýs Shvab «Áıelder men erler álemmen betpe-bet kelgen qubylystarǵa birdeı tótep berý kerek, ári barlyq salada teń bolýy kerek», - dedi. Sondaı-aq keshe Búkilálemdik ekonomıkalyq forým áıelderdiń bilim alýy, densaýlyǵy, ómir súrý uzaqtyǵy, ekonomıkalyq múmkindikteri men saıası quqyqtary boıynsha 144 memlekettiń ishinde júrgizgen reıtıng qorytyndysyn jarııalady.
Jalpy kórsetkishte alǵashqy bestikte Islandııa, Fınlıandııa, Norvegııa, Shvesııa, álem boıynsha parlamentte áıelderdi eń kóp qamtyǵan Rýanda tur. Alǵashqy ondyqqa Irlandııa, Fılıppın, Slovenııa, Jańa Zelandııa, Nıkaragýa engen. Sońǵy oryndarda Iran, Iemen, Saýd Arabııa, Pákistan men Sırııa tur.
Qazaqstan bul tizimde Aýstrııa men Italııanyń ortasynda 51-orynǵa jaıǵasqan. Reıtıngtiń bólimderinde ekonomıkalyq múmkindikteri boıynsha 31, bilim deńgeıi boıynsha – 58, densaýlyq saqtaý, ómir súrý uzaqtyǵy kórsetkishinde birinshi, saıası ómirge aralasýynda 77 orynda tur.
Bir aıta keterligi, jalpy kórsetkishte Qazaqstan Reseı (75), Qyrǵyzstan (81), Japonııany (111) artqa tastaǵan.