«Táýelsiz Qazaqstan» poıyzy el ishine jol tartty

Keshe Qazaqstan halqy Assambleıasynyń bastamasymen el Táýelsizdiginiń 25 jyldyǵy qurmetine arnalǵan «Táýelsiz Qazaqstan» poıyzy» respýblıkalyq aksııasy bastaldy. Naqtylaı aıtqanda, «Táýelsiz Qazaqstan» atty poıyz el ishine saparǵa shyqty. El Táýelsizdiginiń 25 jyl­dy­ǵyn laıyqty atap ótý – barsha qazaqstandyqtyń ortaq maq­saty. Osynaý ulyq merekeni bar múm­kin­diginshe saltanatty jaǵdaıda qarsy alý qoǵamymyzǵa úlken jaýap­ker­shilik júkteıtindeı. Qazirgi tańda elimiz boıynsha Táýelsizdigimizdiń 25 jyldyǵyna arnalǵan túrli sharalar ótkizilýde. Bulardyń barlyǵy da el mereıin ósi­rip, halyq birligin nyǵaıtýǵa baǵyttalǵan. Mine, osyndaı sharalardyń biri kúni keshe As­tanadan bastaý aldy. Ol qashanda el yntymaǵyn arttyrýǵa belsene atsalysyp júrgen Qazaqstan halqy Assambleıasynyń bastamasymen qolǵa alyndy. Osy arada bul respýblıkalyq sharanyń negizgi maqsatyn aıta ke­teıik. Aksııa negizinen Elbasy – Qa­zaqstan Respýblıkasynyń Tuńǵysh Prezıdenti Nursultan Nazarbaevtyń basshylyǵymen elimizdiń Táýelsizdik jyldarynda qol jetkizgen tabystaryn halyqqa tanys­tyrýdy, memleket damýynyń basty qaǵıdattary aıasynda qoǵamdy biriktirýdi, jastardyń patrıottyq sezimderin kóterýdi, jurtshylyqty «Máńgilik El» ıdeıasy tóńiregine jumyldyrýǵa yqpal etýdi, áleýmettik jáne mádenı is-sha­ralar ótkizýdi, turǵyndarǵa dári­gerlik, áleýmettik, quqyqtyq qyz­met kórsetýdi, sondaı-aq, aýyl sharýa­shylyǵy men kásipkerlik salalary boıynsha keńes berýdi kózdeıdi. Respýblıkalyq aksııanyń bastalý saltanaty Astanadaǵy temir jol vokzalynda uıymdastyryldy. Oǵan Memlekettik hatshy Gúlshara Áb­diqalyqova, QHA Tóraǵasynyń orynbasary – Hatshylyq meńgerýshisi Eraly Toǵjanov, Parlament Má­jilisi Tóraǵasynyń orynbasary Vla­dımır Bojko, depýtattar, qoǵam qaıratkerleri, QHA, etnomádenı birlestikter men jas­tar uıymynyń músheleri, zııaly qaýym ókilderi, «Qazaqstan temir joly» UK» AQ qyzmetkerleri, qala turǵyndary qatysty. Sharanyń bastalar sátinde sóz alǵan Gúlshara Ábdiqalyqova atalǵan aksııanyń mán-mańyzyn atap ótti. – Elimiz boıynsha Táýel­siz­digimizdiń 25 jyldyǵyna arnalǵan 200-den asa úlken is-sharalar uıym­dastyrylmaq. Sonyń biri – ózderińiz bas­talý sátine kýá bolyp otyrǵan «Táýelsiz Qazaqstan» poıyzy» aksııasy. Bul poıyz sanaýly mınýttardan keıin aımaqtarǵa, eldi mekenderge jol tartqaly tur. Aksııanyń negizgi maqsaty – Elbasy Nursultan Nazarbaev bastaǵan uly isterdi, jeńisterdi pash etý, el aldynda turǵan aýqymdy mindetterdi, «100 naqty qadam» Ult josparynyń negizgi baǵyttaryn túsindirý. Sonymen qatar, «Táýelsiz Qazaqstan» poıyzy el turǵyndaryna dárigerlik kómek, áleýmettik qoldaý kórsetpek. Sondaı-aq, «Jumyspen qamtý», «Bıznestiń jol kartasy» baǵdarlamalary boıynsha ártúrli keńester berý de aksııa aıasynda basty nazarda bolady. Bulardan bólek, óner, ádebıet, qoǵam qaıratkerleri halyqpen kezdesýler ótkizedi. Men atalǵan sharany uıymdastyrýshylarǵa alǵys aıtamyn. Búgin biz «Táýelsiz Qazaqstan» poıyzyna minip, el ishine attanatyn belsendi azamattarǵa sátti sapar tileıik, – dedi Memlekettik hatshy G.Ábdiqalyqova. О́z kezeginde Eraly Toǵjanov ta «Táýelsiz Qazaqstan» poıyzy» aksııasyna qatysýshylarǵa sátti sapar tiledi. – Táýelsizdik – bizdiń eń bas­ty qundylyǵymyz. Qazaqstandy álemge tanytqan, mereıimizdi tasytqan Táýelsizdigimiz qutty bolsyn! Búgin kóptegen azamattar el ishine attanǵaly tur. Olar Táýelsizdigimizdiń 25 jyly ishinde qol jetkizilgen tabystarymyzdy halyq arasyna nasıhattaıdy, «Máńgilik El» ıdeıasyn jurtshylyqqa túsindiredi. Sondaı-aq, jergilikti jerlerdegi halyqqa kóptegen salalar boıynsha kómek kórsetedi. Bul sharaǵa mınıstrlikter, úsh ulttyq kompanııa qoldaý bildirýde. «Táýelsiz Qazaqstan» poıyzy 35 eldi mekenge toqtap, óz qyzmetin halyqqa usynady. Al 14 jeltoqsan kúni bul poıyz Almatyǵa kelip toqtaıdy. Iаǵnı, osy kúni 43 kúndi qamtyǵan aksııa aıaqtalady. Endeshe, aksııaǵa at salysýshy azamattarǵa kózdegen maqsattaryn abyroımen oryndap shyǵýyna, aman-esen oralýlaryna shyn júrekten tilek bildiremiz, – dedi E.Toǵjanov. Qazaqtyń tuńǵysh ǵaryshkeri, Halyq Qaharmany Toqtar Áý­bákirov búgingi sharany uıym­dastyrýshylarǵa alǵysyn jetkize kelip, Táýelsizdiktiń 25 jyldyǵy qarsańynda qolǵa alynǵan aýqymdy aksııa maqsatynda úlken maǵyna bar ekenin sóz etti. – Qurmetti aǵaıyn! Mine, elimizdiń Táýelsizdigine 25 jyl toldy. Osyǵan oraı úlken aksııa uıymdastyrylyp otyr. Búgin biz «Táýelsiz Qazaqstan» poıyzyn jaýapty da abyroıly saparǵa shyǵaryp salǵaly turmyz. Bul poıyz elimizdiń túkpir-túkpirin aralap, óz mindetin oıdaǵydaı oryndap shyǵady dep oılaımyn. Halyqqa áleýmettik kómek kórsetip, turǵyndarǵa qoldaý bildirýdi maqsat etip otyrǵan poıyzdyń jolǵa shyǵýyn ózim ońdy bastama dep esepteımin. Jalpy, elimizdiń jetistigi kóp. Olardyń barlyǵy túgel aıtylyp júrgen joq. Mine, osy aıtylmaı júrgen tabystarymyzdy jarqyratyp kórsetýimiz kerek. Bul óz kezeginde halyqtyń rýhyn kóteredi, jastardyń patrıottyq sezimderin arttyrady. Ásirese, Qazaqstannyń 25 jyl ishinde halyqaralyq arenadan laıyqty ornyn tapqanyn aıryqsha atap kórsetýimiz kerek. Sonymen qatar, jastarymyzdy tárbıelep, olarǵa bilim berýde kóptegen jumystar atqaryldy. Bul da Táýelsizdiktiń jemisi. Osynyń barlyǵy búgin bastalǵaly otyrǵan aksııa barysynda halyqqa túsindiriledi dep oılaımyn, – dedi Halyq Qaharmany. Budan keıin Parlament Máji­lisi tóraǵasynyń orynbasary Vla­dımır Bojko, Májilis depýtaty Gennadıı Shıpovskıh sóz sóı­lep, aksııanyń mańyzdylyǵyn, onyń maqsaty izgilikke negizdelip otyr­ǵanyn atap ótti. Sonymen birge, aksııanyń ashylý saltanatynda qazaqstandyq óner juldyzdary án shyrqap, jınalǵan qaýymnyń kóńilin odan ári kótere tústi. Sonymen, saǵat 14:15-te Táýel­sizdiktiń 25 jyldyǵyna arnalǵan aksııa aıasynda «Qazaqstan Temir joly» UK» AQ jabdyqtaǵan «Táýelsiz Qazaqstan poıyzy jolǵa shyqty. Astanadan bastaý alǵan poıyzdyń alǵashqy aıaldamasy – Qaraǵandy. Bul poıyzda Rýslan Barbosov bastaǵan arnaıy brıgada qyzmet kórsetedi. Aıta keteıik, «Táýelsiz Qazaq­stan» poıyzy» respýblıkalyq ak­sııa­sy – Táýelsizdigimizdiń 25 jyl­dy­ǵyna arnalǵan iri is-sharalar­dyń biri. Oǵan Qazaqstan halqy As­sam­bleıasynyń, «Nur Otan» par­tııasynyń músheleri, Parlament Máji­lisiniń depýtattary, Máde­nıet jáne sport mınıstrligi, Ǵy­lym jáne bilim mınıstrligi, Ádi­let mınıstrligi, Ulttyq ekonomıka mınıstrligi, Densaýlyq saq­taý jáne áleýmettik damý mınıstr­ligi, Aqparat jáne kommýnıka­sııalar mınıstrligi, Aýyl sharýashylyǵy mınıstrligi, Ishki ister mınıstrligi, Prezıdent janyndaǵy «Qoǵamdyq kelisim» res­pýblıkalyq memlekettik mekemesi qyzmetkerleri, zııaly qaýym, jas­tar uıymdary jáne BAQ ókilderi qaty­sýda. Sondaı-aq, sharaǵa «Ata­meken» UKP, «Báıterek» Ulttyq basqarýshy holdıngi» AQ, «Damý» Kásipkerlikti damytý qory» AQ jáne ózge de uıymdar atsalysýda. Taǵy bir aıta keter jaıt, QHA qoǵamdyq kelisim keńesteri men «Nur Otan» partııasynyń qabyl­daý­larynda Májilis jáne jergilikti máslıhattar depýtattarynyń qatysýymen konsýltatıvtik qyzmet usynylady. Budan bólek, aksııa aıasynda qaıyrymdylyq sharalary da basty nazarda bolmaq. Dáliregi, poıyz baǵytyndaǵy qala­lar men eldi mekender kitapha­nalaryn kitaptar toptamasymen qamtamasyz etetin «QHA Teńdessiz syı», balalar men jasóspirimder úıine arnalǵan «Qaıyrymdylyq kerýeni» atty sharalar ótkiziledi. Sonymen qatar, aksııa sheń­berinde «Táýelsizdik tarıhy – ult rýhynyń ólshemi», «Máńgilik El – bolashaǵy birtutas ulttyń rýhanı negizi», «Beıbitshilik pen kelisim úlgisi – Qazaqstan brendi», «QHA – qoǵamdyq kelisimdi nyǵaıtýdaǵy bas medıator» taqyryptarynda kezdesýler men tanystyrylymdar uıymdastyrylmaq. Buǵan qosymsha jetekshi shyǵarmashylyq ujymdardyń, qazaqstandyq óner sheberleriniń, óńirdegi daryndy jastardyń merekelik konsertin ótkizý de aksııa josparynda bar. Sondaı-aq, joǵaryda atalǵan mınıstrlikterdiń ókilderi tara­py­nan halyqqa qajetti keńester beriledi. Naqtylaı aıtqanda, densaý­lyq salasy boıynsha dári­gerlik keńes berilip, tolyqqandy medı­sınalyq tekserý qyzmeti kórse­tiledi. Al áleýmettik másele­ler boıynsha «Jumyspen qamtýdyń jol kartasy-2020» baǵdarlamasyna, azamat­tar­dyń eńbek quqyǵyn qorǵaý, zeınet­aqymen qamtamasyz etý, járdemaqy tóleý isterine qatysty keńester usynylady. Zań salasyna qatysty jyljymaıtyn múlikti esepke alý, alımentterdi tóleý, zańdy tulǵany tirkeý, kásipodaq qyzmeti jóninde jáne taǵy basqa da baǵyttarda keńester beriledi. Sol sııaqty, aýyl sharýashylyǵy salasyna baılanysty keńes berý qyzmeti de basty nazarda bolmaq. Dáliregi, turǵyndar tıisti organ ókilderinen jer qatynastaryna, egin jınaý naýqanyna, kooperasııany damytýǵa, jeke qosalqy sharýashylyqqa, et, sút ónimderin óndirýge, ósimdikterdi qorǵaýǵa, asyl tuqymdy mal ósirý jáne basqa da máselelerge qatysty maǵlumattar ala alady. Buǵan qosa, bilim salasy boıynsha da keńes berý isi jolǵa qoıylady. Iаǵnı, jergilikti turǵyndar joǵary bilim berý, tehnıkalyq jáne kásibı bilim berýdiń basym baǵyttary týraly aqparattar alatyn bolady. Joldybaı BAZAR, «Egemen Qazaqstan» Sýretterdi túsirgen Erlan OMAROV, «Egemen Qazaqstan»