Ryshan Sársekeevanyń mamandyǵy – zańger. Joǵary oqý ornyn támamdaǵan soń ol mamandyǵyna saı jumysty ońaı tapty. Aldymen sot oryndaýshysy boldy, odan keıin jekemenshik kompanııada zańger retinde tájirıbe jınady. Qazir ol – óz isin dóńgeletip otyrǵan kásipker-aspaz.
Mamandyǵy zańger bolsa da Ryshan burynnan jeke kásiptiń ıesi bolýdy armandaıtyn. Basynda isin neden bastaıtynyn bilmeı, áýre-sarsańǵa túsedi. Bir jaǵynan tórt jyl oqyp, ter tógip alǵan dıplomy kádege aspaı qala ma dep te alańdaıdy. Biraq táýekelge bel baılap, kútpegen sheshimge keledi. 2015 jyly úshinshi balasyn dúnıege ákelip, dekrettik demalysqa shyqqanda óziniń nan men toqash pisirýge ebi bar ekenin baıqaıdy. Ne pisirse de dámdi bolyp shyǵady, balalary talasyp-tarmasyp jeıdi. О́zine de nan pisirý unap qalady. Nannyń tátti bolyp shyǵýy reseptti qatań saqtaýmen ǵana shektelmeıtinine, oǵan júreginiń jylýyn da berý qajettigine kózi jetedi. Ara-tura pisirgen nanynan kórshilerine de dám tatqyzady. Olar da Ryshannyń nanyn maqtaı bastaıdy. Eldiń jyly pikirinen keıin oǵan nan, toqash ónimderin pisirip satsam qaıtedi degen oı keledi. Eseptep qarasa, kompanııadan alatyn aılyq jalaqysyn osy kásipten jarty aıda-aq shyǵaryp alady eken. Onyń ústine óz-ózine qoja, jumystan qalyp qoımaıyn dep asyqpaıdy. Bir mezgil úıdiń tirshiligine ýaqyt taýyp, balalaryna da kóbirek kóńil bóledi. Osynyń bárin oı eleginen ótkizgen ol arnaıy oqytý kýrsyna baryp, osy saladaǵy myqty mamandardyń sheberlik dáristerinen ótedi.
Sonymen 2015 jyly Ryshan Sársekeeva ózi turatyn Beskól aýylynda «Caramel» degen ataýmen aspazdyq dámhana ashady. Soltústik Qazaqstan oblystyq Kásipkerler palatasyna qaıyrylyp, memlekettik kómek alýǵa ótinish beredi.
«О́z isimdi aldymen nan men toqash pisirýden bastaǵan men kóp uzamaı kondıterlik ónimderdiń birneshe túrin jasaýdy úırenip aldym. Satyp alýshylarym da kóbeıip, olar maǵan aldyn ala kezekke jazylatyn boldy. Tapsyrys bereýshilerdiń qatary kúnnen-kúnge artty. Bul jaǵdaı meni qanattandyryp, qoldan jasaǵan ónimderim budan da tátti, budan da sapaly bolýy úshin sheberligimdi shyńdaı tústim», deıdi Ryshan.
Kásipkerler palatasy Ryshannyń ótinishin jerge tastamaıdy. Bólim bastyǵy Ásel Samaratova men menedjer Dmıtrıı Shledovıs bıznes-jospar jasaýǵa kómektesip, ózi turatyn Qyzyljar aýdandyq mansap ortalyǵynan 1,5 mln teńge grant alýǵa qol jetkizedi. Bul qarajatqa Ryshan aldymen as pisirýshige qajetti mıkser, blender, tońazytqysh sekildi jabdyqtar satyp alady. Buryn qamyrdy qolmen ılep kelgen kelinshek endi elektr nan ılegishtiń kómegimen sapaly qamyr daıyndap alatyn boldy.
Qazir «Caramel» aspazdyq-kafeterıiniń ónimderi túrlene túsken. Turǵyndar bul jerden tátti samsa, chebýrek, kondıterlik ónimder, ystyq tamaq pen salattardy talasa-tarmasa alady. Al Ryshannyń ózi býy burqyraǵan as daıyndaıtyn bólmede mańdaı terin súrtip qoıyp, talmaı eńbek etip jatady.
Búginde ol óz ónimderin Petropavl qalasynyń dúkenderi men dámhanalaryna da satýdy kózdep otyr. «Kásipti qolyńa alyp, erinbeı eńbek etseń, esh qıyndyǵy joq eken. Mine, az ýaqytyń ishinde kásipker bolyp shyǵa keldik. О́zimniń turaqty alýshylarym da qalyptasty», dep jymııady ol.
Soltústik Qazaqstan oblysy