Jambyl oblysynda birer jylda bir aınalyp soǵatyn quıyn jelden Jańatas jurty jabyǵyp, Qarataý halqy qamyǵyp jatatyny bar. Úsh jyl buryn osy eki aýdan halqy qytymyr qys mezgilinde jylý men jaryqtan ajyrap, yqylym zaman adamdarynyń kúıin keshken edi. 6 aqpanda soqqan daýyl jel Jańatas qalasynyń halqyn ábigerge saldy.
Qatty jelden 7 turǵyn úıdiń shatyry jartylaı ushyp ketti. Sondaı-aq 7 kásipkerlik nysannyń shatyry búlinip, shamamen 2 shaqyrymǵa jýyq elektr jelisi úzilgen. Mundaı quıyn jeldiń talaıyn kórse de, qala halqy osy joly tipti dúrligip qaldy.
О́ńir basshysy E.Qarashókeev Sarysý aýdanyna arnaıy baryp, daýyl saldarynan búlingen nysandardy aralap, jaǵdaımen tanysty. Jergilikti halyqpen pikirlesti.
«El ishinde «apat aıtyp kelmeıdi» degen sóz bar. Ekpini sekýndyna 32 metrge deıin jetken joıqyn jel bárimizdi qatty alańdatty. Tabıǵattyń tosyn minezine árqashan daıyn bolýymyz kerek. Aýdandyq deńgeıde tótenshe jaǵdaı jarııalandy. Apat saldaryn joıýǵa qajetti qarjy qarastyryldy. Bul másele tikeleı ózimniń baqylaýymda bolady», dedi oblys ákimi jergilikti halyqtyń kókeıindegi kúdikti seıiltip.
Jańatastaǵy jel saldarynan eń bastysy adam zardap shekpegenine táýbe dep otyrmyz. Qalaı bolǵan kúnde de Jańatas pen Qarataý halqy qys mezgilinde dúleı daýyl soqpasa dep tilep otyrady. Qysqa qansha daıyndyq jumysy júrgizilse de, eki qalanyń turǵyndary tabıǵattyń tosyn minezinen aıtarlyqtaı qaımyǵady.
Qazir daýyl saldarynan kelgen zardapty joıýǵa qatysty naqtyly jumystar atqarylyp jatyr. Qys mezgili jetse, bet qaratpaıtyn boranmen alysatyn Jýaly jurty, joıqyn jelden júreksinetin Qarataý men Jańatas halqy budan buryn da talaı qıyndyqty bastan ótkergen. Tabıǵattyń osy jolǵy tosyn synaǵy olardyń qasynda jeńildeý kórinedi. Eń bastysy, jergilikti halyqtyń júıkesin juqartqan joıqyn jel qaıtalanbasa bolǵany.
Jambyl oblysy