Qazaqstan men Armenııa arasynda jańa áýe reısteri iske qosyldy. Endi el turǵyndary Almatydan Erevanǵa tikeleı qatynaı alady, dep habarlaıdy Egemen.kz.
Kólik mınıstrliginiń málimetinshe, 12 maýsymnan bastap Qazaqstannyń áýe tasymaly naryǵyna Armenııanyń jańa áýe kompanııasy – «FlyOne Armenia» qosyldy.
Áýe tasymaldaýshy Erevan – Almaty baǵyty boıynsha aptasyna eki ret, dúısenbi jáne juma kúnderi tikeleı turaqty jolaýshylar reısterin oryndaıdy. Sonyń nátıjesinde Qazaqstan men Armenııa arasyndaǵy áýe reısteriniń jıiligi aptasyna 3 reısten 5 reıske deıin artady.
«Mınıstrlik ushý baǵyttarynyń geografııasyn keńeıtý men halyqaralyq reıster sanyn arttyrý boıynsha júıeli jumys júrgizip keledi. Qazaqstan men Armenııa arasyndaǵy jańa áýe qatynasynyń ashylýy eki el arasyndaǵy saýda-ekonomıkalyq, iskerlik, ınvestısııalyq, týrıstik jáne mádenı yntymaqtastyqty odan ári damytýǵa yqpal etedi», delingen Kólik mınıstrliginiń habarlamasynda.
Vedomstvo halyqaralyq áýe baǵyttaryn keńeıtý jumystaryn aldaǵy ýaqytta da jalǵastyratynyn málimdedi.
Eske sala keteıik, buǵan deıin FlyArystan kompanııasy jazǵy demalys maýsymyna oraı Atyraýdan Batýmıge tikeleı reıs ashty. Sondaı-aq kompanııa jaqynda Astana men Aqtaýdan Batýmıge tikeleı reıster qatynaıtynyn málimdedi.