«Qaraǵandy qalasynyń halyqty jumyspen qamtý ortalyǵy» kommýnaldyq memlekettik mekemesi WhatsApp mobıldik qosymshasy arqyly jumys qarastyrý boıynsha jańa áleýmettik jobany iske qosqanyna bes aıdan asty. Asa kóp ýaqyt óte qoımasa da, bul joba tamasha nátıjelerge qol jetkizip, kópshiliktiń yqylasyna bólenip úlgerdi.
Búginge deıin osy bastama sheńberinde arnaıy qosylǵan jelige jumysqa turý máselesimen qalanyń 2400-den astam turǵyny habarlasyp, sonyń 400-ge jýyǵy jańa jumyspen qamtylǵan eken. Sonyń ishinde otyz shaqty adam jastar tájirıbesinen ótýge, qyryq shaqty adam áleýmettik jumys oryndaryna jáne 15 adam qoǵamdyq jumystarǵa joldama alǵan. Qol qýsyryp úıde otyrǵannan bul áldeqaıda tıimdi de paıdaly emes pe.
WhatsApp jelisi boıynsha jumys izdegenderdiń biri Olga Anısımovaǵa jumyspen qamtý ortalyǵy Qaraǵandynyń №39 mektep-balabaqsha keshenine baryp, áńgimelesý synynan ótýge keńes bergen eken. Onyń joly bolyp, búginde sol mektepte aqparattaný pániniń muǵalimi qyzmetin atqarýda.
Jańa maman nemese bos jumys ornyna qyzmetker izdegen mekemeler de mobıldik qyzmetke jıirek habarlasatyn bolǵan. Solardyń biri Qaraǵandydaǵy №3 perzenthananyń basshylyǵy da Jumyspen qamtý ortalyǵyna WhatsApp jelisi arqyly habarlasyp, ózderi óte qajet etip otyrǵan akýsher mamandardy ońaı tapqan.
Bos jumys oryndary úlken qalalarda barshylyq. Tek jumys berýshi men jumys izdeýshi birin-biri tappaı jatady. Aıtalyq, Qaraǵandynyń 132 mekemesinde osy kúnderi 998 bos jumys orny bar eken.
WhatsApp qosymshasy arqyly áleýmettik nemese kásiptik baǵdar boıynsha aqyl surap habarlasatyndar da jeterlik. Olardyń bárine saýalyna qaraı meılinshe paıdaly keńester beriledi. Jumys tapqan soń joǵalyp ketpeı, alǵysyn jaýdyra qaıta habarlasatyn jandar jańa jobanyń qanshalyqty paıda ákelip otyrǵanynan habar berse kerek.
Qaırat ÁBILDINOV,
«Egemen Qazaqstan»
QARAǴANDY