Almatydaı úlken shaharda «Aqsaı nanyn» jemeıtin adam neken-saıaq bolar. О́ıtkeni, 200-den astam nan-toqash túrin pisiretin kombınat ónimderiniń dámin qazir almatylyqtar ǵana emes, Taldyqorǵan, Astana, Qyzylorda, Aqtaý, Shymkent, Taraz qalalarynyń turǵyndary da tatyp otyr.
Parlament Májilisi Tóraǵasynyń orynbasary, «Nur Otan» partııasy fraksııasynyń jetekshisi Gúlmıra Isimbaeva, Májilis depýtattary – Serik Seıdýmanov, Jámıla Nurmanbetova, Serik Qusaıynov, Gúlnar Bıjanova, Olga Shıshıgına Almaty qalasyndaǵy asa qýatty jáne iri kásiporynnyń birinen sanalatyn «Aqsaı nan» ónimderi kombınatynyń sehtaryn aralap, jumys úderisimen tanysty.
Kezdesýde Májilis depýtattary aldymen memlekettik baǵdarlamalar týraly sóz qozǵady. «Bul baǵytta 500 mıllıonnan asa sharýashylyq nysandary óz kúshterin biriktire alady. Bizge ýaqyt talabyna saı jańa ınnovasııalyq tehnologııaǵa negizdelgen, aýyl sharýashylyǵynyń barlyq ónim túrlerin óńdep, paıdaǵa asyratyn sońǵy úlgidegi agroónerkásiptik ındýstrııany damytý qajet. Bul jańa baǵdarlama, mine, dál osy maqsatty kózdeıdi», – dedi G.Isimbaeva.
«Aqsaı nan» kombınaty qyzmetkerleriniń qoıǵan saýaldaryna jaýap berildi. Sondaı-aq, depýtattar sońǵy jyldary el Parlamentinde agroónerkásip salasyn damytýǵa baǵyttalǵan birqatar jańa zańdar qabyldanǵanyn atap aıtty.
Depýtattar, sondaı-aq, páter ıeleri kooperatıvteri men turǵyn úı-kommýnaldyq sharýashylyq máselelerine arnalǵan keńeıtilgen jıynǵa qatysyp, ál-Farabı atyndaǵy Qazaq ulttyq ýnıversıtetiniń professorlyq-oqytýshylar quramymen kezdesti.
Aınash ESALI,
«Egemen Qazaqstan»
ALMATY