Parlament Senatynyń depýtattary Rashıt Ákimov pen Jabal Erǵalıev Aqmola oblysynyń ákimi Sergeı Kýlagınmen kezdesip, pikir almasty.
– О́tken jyldy aqmolalyqtar tabysty qorytyndylady. Dıqandar qaýymy 5,7 mıllıon tonna astyq jınap, aýyl sharýashylyǵy salasynyń jalpy ónimi rekordtyq 300 mıllıard teńgege jetti, – dedi S.Kýlagın.
Senatorlar Parlament Senatynyń atqarǵan jumystary týraly jáne qabyldanǵan zań jobalary jaıly aıtyp berdi.
Kókshetaý qalasyndaǵy «Qazaqstan AgroInnovasııalyq Korporasııa» jaýapkershiligi shekteýli seriktestiginde bolǵan senatorlar kóp salaly aýyl sharýashylyǵy tehnıkasyn qurastyrý jaıymen tanysty. Munda Belarýs jáne Reseı óndiristerinen ákelinetin daıyn ónimderden aýyl sharýashylyǵy jáne kommýnaldyq sharýashylyqqa qajetti tehnıka qurastyrylady. Jobanyń jalpy quny 3375 mıllıon teńgeni quraıdy.
Senatorlar óndiris mamandarymen, jumysshylarymen pikir almasyp, elimizde údemeli ındýstrııalandyrý baǵytynda júrgizilip jatqan jumystarǵa memleket tarapynan kórsetilip otyrǵan qoldaý men kómekter jaıly keńinen aıtyp berdi.
Baqbergen AMALBEK,
«Egemen Qazaqstan»
Aqmola oblysy