Balalarǵa da qamqor

Prezıdenttikten úmitker Ǵanı Qasymov Talǵarǵa baryp, aqsaqaldyń aq batasyn aldy Burnaǵy kúni Almaty irgesindegi Talǵarǵa joly túsken Ǵanı Qasymovty óz jaqtastary «Aısem ı KO» JShS jekemenshik qurylys kompanııasy keńsejaıynyń aldynda kilem tósep, án-kúımen dýmandata qarsy aldy. Naq osy jerde Patrıottar partııasy saılaýaldy naýqanynyń Almaty oblystyq shtaby ornalasqan. Atalmysh kásiporynda búgingi tańda 150-ge jýyq adam jumys­pen qamtylǵan. Kezinde osy kom­pa­nııanyń aıaǵynan tik turyp ketýine burynǵy áskerı, isker bas­shy Serik Aıtqojınniń jankesh­ti­ligine qosa, Ǵanı Esengel­di­uly­nyń qoldaýy da septigin tıgizgen. Sodan da bolar, ujym túgeldeı der­lik prezıdenttik saılaýǵa Pat­rıottar partııasy qosqan úmit­ker­diń tilekshileri ekenin aıtyp otyr. Osy arada bolǵan prezıdenttikten úmitkermen kezdesýge Qa­zaqstan zaǵıptar qoǵamy Tal­ǵar­daǵy óndiristik kásipornynyń jumysshylary, «Pokolenıe» qo­ǵamdyq birlestigine múshe zeınetkerler, sondaı-aq slavıandar­dyń etnomádenı birlestigi men tal­ǵarlyq jastar ókilderi qa­tysty. «Sizdi kórmegeli de kóp jyl­dyń júzi bolypty-aý», dep bir egde áıelder Ǵanı Esengeldi­ulymen emen-jarqyn amandasyp jatyr. – Talǵardyń eli men jeri me­niń janyma jaqyn. Balalyq sha­ǵym da Uzynaǵash, Degeres sııaq­ty osy óńirge jaqyn jerlerde ótti. Talǵar buryn myńǵyrtyp mal ósirgen, máýesi yrǵalǵan qut-berekeniń ordasy edi. Sol jaq­sylyqtardy qaıtadan jań­ǵyr­tý kerek. Budan 11 jyl bu­ryn prezıdenttik saılaýǵa tús­ke­nimde Talǵarda bolǵanmyn, – dep sóz bastaǵan úmitkerge ár tus­tan: «Biz sonda sizge daýys bergenbiz», degen únder estildi. Ǵ.Qasymov óziniń saılaýaldy baǵdarlamasynyń ma­ńyzdy tus­taryna toqtaldy. Ha­lyqpen kezdese júrip, óz tur­mysyna to­lyqtaı razy adamdy kórmegenin aıtty. «Mysaly, myna búgingi kózderi kórmeıtin zaǵıp adamdar mekemesi jalpyǵa birdeı negizde salyq tóleıdi, kom­mýnaldyq tólemder boı­yn­sha eshbir jeńil­dik almaıdy, bul kúnde jumys­tary toqtap tur, kúnkóristik az ǵana óndiristerin keńeıtýge múmkindikteri joq. Al sony biz­diń bılik kórme­gen­sı­di, shyn nıetterimen jany ashyp, kómek­tespeıdi», dedi kandıdat. Osylaı deı kele, úmitker daýys bergende biz osyndaı kemshilik­terdiń joıy­lýyn qa­per­de us­taýǵa, eldiń jáne ózi­miz­diń erteńgi bolasha­ǵymyzdy tańdaıtyny­myz­dy umyt­paýǵa shaqyrdy. Kezdesýde biraz jaılardyń basy shalyndy, Talǵar kóshe­leri­niń jaısyzdyǵy, aýdanda segiz jyldan beri 6 myń otba­sy­nyń jer telimi kezeginde tur­ǵan­dyǵy, aýyldy kóterý qajettigi, áıelderdi zeınetkerlikke 55 jastan bastap shyǵarý kerektigi, basqa da ózekti problemalar aıtyldy. Budan soń prezıdenttikten úmitker osyndaǵy «Nur» otba­sylyq balalar úıine bardy. Bul balalar úıi ardager pedagog Tuıaq Esqojınanyń bastaýymen 1998 jyly ashylsa, sodan beri Ǵanı Esengeldiuly «jetim kórseń jebeı júr» degen ata saltyna ba­ǵyp, osynaý qaıyrymdylyq negizindegi mekemege qadarı-ha­linshe qolushyn berýden tanǵan emes. Qazirgi han saraıyndaı eńseli ǵımaratqa ıe bolýyna da, onyń mańaıyn kórkeıtý-abat­tandyrý jumystaryna da, basqa túsken basqa qıynshylyq jaǵ­daılarda da Ǵanekeńniń izgilikti kómegin 110 balanyń anasy Tuıaq Qaskenqyzy kórýdeı-aq kórgen. Balalardyń úlken júrekti qam­qor dosy osy joly da qurqol kelmepti. Ataýly syılyǵy – «Karaoke» mýzykalyq beınetaspa apparatýrasy. Ǵanı Esen­gel­diulymen osy kezdesý de balalar úshin máz-meıram qýanyshty merekege aınalyp júre berdi. Tuıaq ana alaman báıgege shapqan aza­mat­qa naýryz beıildi rahmetin aıtyp, aq jol tiledi. Bala­lar­dyń án shyrqatyp, quıqyljyta bı bılep qoıǵan ádemi konsertinen keıin jaıylǵan aq das­tar­qan ústinde «Nur» balalar úıiniń atasy Ánýar Baısarın aqsaqal Ǵanı inisine aq nıetimen shubyrtyp aq batasyn berdi. Qorǵanbek AMANJOL. Almaty oblysy. ------------------------------ Sýretterdi túsirgen Bersinbek SÁRSENOV.