Qaıta oralǵan kommýnıstik senbilik

Keshe Astanadaǵy QKHP-nyń qalalyq komıteti ornalasqan Beıbitshilik kóshesiniń boıynda kezekten tys prezıdenttik saılaý qarsańynda kommýnıstik senbilik uıymdastyryldy. Bul sharaǵa Kommýnıstik halyqtyq partııaǵa múshe azamattar uıytqy boldy. Qolyna kúrek ustap, qalany kúl-qoqys pen qardan tazartý úshin senbilikke shyqqan azamat­tar­dyń biri – Ǵabdolla Zarıpov. Eńbek ótili 58 jyldy ıektegen qarııa Kommýnıstik partııa qata­ry­na 50-shi jyldary qosylǵan eken. Jasy 86-ny eńserse de, qarttyń júrisi shıraq, qımyly epti kórindi. «Bizdiń senbilikti uıymdastyrýdaǵy maqsatymyz – ózge partııalarǵa úlgi kórsetý. Olar­dyń da osyndaı ıgi shara­lar­dy atqarýyna muryndyq bolý. Búgin biz bir kisideı jumylyp, osy senbilikke qatysýǵa keldik. Sol arqyly qalanyń tazaly­ǵy­na, kórikti bolýyna úles qospaq nıettemiz», – dedi ardager kommýnıst. Sondaı-aq, ol búginde Kommýnıstik halyqtyq partııa kóter­gen bastamalarǵa halyqtyń kóp bóligi qoldaý kórsetip otyrǵa­nyn, bul halyq­shyl­dar úshin óte mańyzdy ról atqa­ra­tynyn aıtyp ótti. «Bizdiń baǵdar­la­ma­larymyz – el turǵyndaryn jumyspen qam­týǵa, qarttardyń zeınetaqy­laryn kóterýge, bir sózben aıt­qanda, ha­lyq­tyń áleýmettik áleýe­tin jaqsartýǵa ba­ǵyt­talýy­men qundy», – dedi Ǵ.Zarıpov. Atalǵan sharanyń basy-qa­synda júrgen jandardyń aı­týyn­sha, bul bastama saılaýaldy úgit-nasıhat jumystarynyń soń­ǵy kúnderine oraılastyrylyp otyr eken. «Búgingi senbilikke 35 adam jınaldy. Olardyń ara­synda bizdiń ardagerler, partııa­nyń qalalyq komıtetiniń múshe­le­ri jáne saılaýaldy naýqanyna qolushyn berip júrgen jastar da bar. Budan keıin Jeltoqsan kó­shesi men Jeńis jáne Respýblıka dańǵyldaryna da baryp, sol jerlerde de senbilik ót­kiz­bekpiz. Senbilik – bizdiń partııa atynan saılaýǵa túsip otyrǵan Jambyl Ahmetbekovtiń aldaǵy saıası naý­qanǵa qatysty saı­laýaldy naýqanynyń sońǵy sharalarynyń biri. QKHP-nyń ortalyq shtaby da bizge osyndaı senbilik ótkizý jóninde usynys aıtqan bolatyn», – dedi QKHP Astana qalalyq komıtetiniń birinshi hatshysy Umsyndyq Baızaqova. Láıla EDILQYZY. Astana. --------------------------- Sýrette: halyqshyl kommýnıster senbilikte.