Márege jaqyndaǵan saıyn shabystyń údeıtini bar. Prezıdenttikten úmitkerlerdiń qazirgi kúıin solaı sıpattaýǵa bolǵandaı. Halyqtyń bárimen kezdesip úlgermeısiń, biraq kóbirek kezdesý paryzdaı kórinedi. Kúni keshe Qaraǵandyda bolǵan «Tabıǵat» ekologııalyq odaǵynyń tóraǵasy Mels Eleýsizov endi Almaty jurtshylyǵynyń arasynda júrdi. Onyń saılaý aldyndaǵy is-áreketine zer salyp otyrǵandar buǵan shynymen-aq tańdanys bildiredi.
Kópten beri kóńilinde júrgen bir másele qylmystaryn ótep jatqan kámeletke tolmaǵan jasóspirimderdiń ómirimen tanysý edi. Sol úshin prezıdenttike kandıdat Mels Eleýsizov LA – 155/6 dep atalatyn mekemege keldi. Tártipke qatań qaraıtyn jer – barlyǵy da tap-taza, ondaǵy keshki mektep jaqsy jabdyqtalǵan eken. Aralap kórip, kóńilderi toldy. Qazir munda kanıkýl, sodan da aıryqsha tynyshtyq.
Balalarǵa degen Mels Hamzaulynyń kóńili erekshe. Kezinde komsomol uıymynyń jetekshisi bolyp jumys istegende de, keıin óz ómirin tabıǵat qorǵaýǵa arnaǵanda da balalarmen qarym-qatynasta boldy. Olardyń ómirimen tanys. Qıyn balalardy ómir jasaıdy, olar sol ómirdiń qıyndyǵyna kezikkende buzylady. Olarǵa ata-anasynyń qıyn ómiri áser etedi. Endi solarǵa basty kómek – olardy ıgilikti iske aralastyrý qajet. Qıyn jaǵdaıǵa dýshar bolǵan bala adamı qamqorlyqqa zárý. Sony arnaýly mekemeler de, onda jumys isteıtin adamdar da oılaýǵa tıis.
Ataqty ekolog osyndaǵy jasóspirimdermen kezdeskende, olardyń ynta-qumarlyqtaryna nazar aýdarǵanda, olardyń da ekologııa máselesine jany jaqyn ekenin ańǵaryp, sol máseleni áńgimesine arqaý etken.
– Men kópten beri Kaspıı, Aral, Balqash sý kózderin lastanýdan qorǵaý máselesimen aınalysyp júrmin, – dep ekolog jasóspirimderge ózekti oıyn aıtty. – Bul – bolashaǵymyzdyń máselesi. Sender belsene aınalysatyn másele. Almatynyń aýasy ońalý úshin de barlyǵymyz bolyp kóp nárse isteýimiz kerek.
О́zderine keń dárejede sóz arnaǵan osy bir aǵaılarynyń áńgimesi jasóspirimderge unap, olardyń arasynda erkin áńgime órbidi. Tipti olar basqa da kóptegen máseleni sóz etisti. Ásirese, sot júıesi týraly áńgime qyzý boldy. Bireýleri qylmystyń úlken-kishisine qaramaı, birdeı jaza qoldanylatynyn da aıtty. Oǵan Eleýsizov te túsinistikpen qarap, jalpy, sottyń qaıyrymdy bolǵany durys, biraq qylmys jazasyz qalmaýy kerek dep ýájge shaqyrdy.
– Eń basty másele – qylmysqa aparatyn joldy jabýymyz kerek, – dedi Mels Hamzauly. – Sondaı balalar jaqsy iske aralassyn, tabıǵatqa qamqor bolǵan bala qylmysqa bara qoımaıdy.
Túzeý mekemesiniń basshylarymen áńgimesinde prezıdenttikke kandıdat ózderiniń ortaqtasa isteıtin jumystarynyń kóptigin, oǵan óziniń árqashan da ázir ekenin aıtty.
* * *
Qazir prezıdenttikke kandıdat M.Eleýsizovtiń saılaýaldy shtabynda da qarbalas sát. Jurt murnynan shanshylyp júr. Senim bildirilgen adamdardyń qaısysy qaı jerge baratyny, prezıdenttikten úmitkerdiń ózi qaı saılaý ýchaskesinde daýys beretini, jalpy sol saılaý kúni qandaı sharalar uıymdastyrylyp, qandaı sharalarǵa qatysatyndary aıqyndalyp qana qoımaı, qaıta-qaıta pysyqtalyp jatyr.
Bul úlken naýqandy qorytyndylaıtyn da kez kelgendeı. Sirá, «Tabıǵat» ekologııalyq odaǵynyń tóraǵasy Mels Eleýsizov úshin, onyń senimdi ókilderi úshin, jalpy «halyq ekologyn» qoldaıtyn qaýym úshin ol aıtarlyqtaı tabysty bolǵandaı. Ýaqyttyń múmkindigine oraı prezıdenttikke kandıdat eldiń biraz aımaǵynda bolyp, onyń jurtpen kezdesýi barlyq aqparat quraldarynda jan-jaqty kórsetildi. Bul jerde sol resmı aqparat quraldary tarapynan prezıdenttikke kandıdattyń barlyǵyna birdeı múmkindik berilgeni osy saılaýdyń aıryqsha ereksheligi bolǵany óz aldyna, ony prezıdenttikten úmitkerler de tıimdi paıdalandy. Sol aqparat quraldarynda jarııalanǵan, kórsetilgen materıaldarǵa qarap, halyq arasynda elimizdiń tabıǵat qorǵaýshysy jaıly aıtarlyqtaı mol maǵlumat tarap, onyń jaǵymdy kelbeti qalyptasty degen jón shyǵar. Sodan da saılaýshylardyń bir tobynyń óz tańdaýy elimizdiń bolashaǵyna úlken senimmen qaraıtyn, onyń ıgiligi úshin kúsh-jiger, qajyr-qaıratyn aıamaıtyn kúresker azamat Mels Hamzauly Eleýsizovke túsetini anyq.
Mamadııar JAQYP.