Oblys ákimi Sergeı Kýlagın TMD baıqaýshylar mıssııasynyń ókilderimen kezdesti. Baıqaýshylar Reseıdiń Qostanaımen shektesetin Chelıabi oblysynan kelipti. Topty Chelıabi oblystyq ákimshiliginiń aımaqtarmen jumys jónindegi basqarmasynyń bastyǵy Vıtalıı Shıkov bastap keldi. Aldymen aımaq basshysy qonaqtardy oblys tynysymen tanystyrdy. Al chelıabilik baıqaýshylardyń bul Qostanaıǵa birinshi ret kelýi emes edi.
– Qatar jatqan el bolǵandyqtan, Qazaqstannyń saıası, ekonomıkalyq ómirinen habarymyz mol. Biz máslıhattar saılaýynda da, sońǵy prezıdenttik saılaýǵa da kórshi Qostanaı oblysyna baıqaýshy retinde kelgen edik. Mine, endi búkil dúnıe qarap otyrǵan merziminen buryn ótkeli otyrǵan prezıdenttik saılaýǵa taǵy da keldik. «Kórshi haqysy» degen bar, onyń ústine bir-birimizden úırenerimiz de mol, – dedi delegasııa jetekshisi Vıtalıı Shıkov. Chelıabiden 21 baıqaýshy keldi. Olar qalalar men aýdandarǵa baryp, daýys berý barysyn baqylaıtyn bolady.
Kezdesýde oblystyq saılaý komıssııasynyń tóraıymy Antonına Markova baıqaýshylardy saılaýǵa daıyndyqtyń negizinen aıaqtalǵanynan habardar etti. Oblysta 4 qalalyq, 16 aýdandyq jáne 860 ýchaskelik saılaý komıssııasy bar. Olardyń barlyǵy da jumysqa qajetti uıymdastyrý tehnıkalarymen, quraldarmen zań sheńberinde jabdyqtaldy.
Kezdesýde chelıabilik baıqaýshylar oblystyq saılaý komıssııasynyń tóraıymyna saılaýshylardyń saılaýǵa qatysýy úshin qandaı jumystar júrgizilgendigi týraly saýaldar qoıdy. Antonına Mıhaılovna olarǵa daıyndyq jumystary týraly áńgimeleı kelip, qostanaılyqtar elimizdiń taǵdyryna salǵyrt qaraı almaıtyndyǵyn, ótken prezıdenttik saılaýda da oblystaǵy saılaýshylardyń 85,5 paıyzy saılaý ýchaskelerine kelip, daýys bergendigin aıtty. Saılaý komıssııasynyń tóraıymy bul joly da qostanaılyqtardyń daýys berýge belsendilikpen kelip, óz tańdaýyn jasaıtyndyǵyna senimdi.
Sonymen qatar, prezıdenttik saılaýdyń demokratııalyq deńgeıde ótýin baqylaý úshin oblysqa EQYU-dan eki uzaq merzimdi jáne 23 qysqa merzimdi baıqaýshy keldi.
Názıra JÁRIMBETOVA.
Qostanaı.