Búgin Qazaqstan Respýblıkasynyń prezıdenttigine kandıdattardyń jáne olardyń senim bildirilgen adamdarynyń, sondaı-aq ózge de azamattardyń úgit jumystaryn júrgizýine bolmaıdy, tyıym salynǵan. Osyǵan baılanysty keshe Ortalyq saılaý komıssııasynyń hatshysy Baqyt Meldeshov BAQ ókilderin saılaýaldy úgit sharalarynyń qalaı ótkeninen habardar etti.
OSK hatshysynyń aıtýynsha, prezıdenttikke kandıdattardyń saılaýaldy úgit naýqany zań buzýshylyqsyz ótti deýge bolady. Naýqan barysynda birshama kemshilikter de kezdesken. Olar negizinen keıbir kandıdattardyń bılbordtary men syrtqy jarnamalarynyń merziminen keshiktirilip ornalastyrylýyna baılanysty. Degenmen, atalǵan kemshilikter shuǵyl túrde sheshilip, qalpyna keltirilipti.
– Sondyqtan úgit naýqany barysynda aıtarlyqtaı zań buzýshylyqtar boldy dep aıta almaımyz, – dedi Baqyt Meldeshov osy jóninde. – Kandıdattardyń úgit jumystary búgin (1 sáýir) saǵat 24.00-de aıaqtalady. Ilingen bılbordtar, plakattar men paraqshalar alynbaıdy, sol oryndarynda qalady.
Ortalyq saılaý komıssııasynyń hatshysy sóz barysynda daýys berýge kelgen saılaýshylarǵa aýmaqtyq saılaý komıssııalary tarapynan yntalandyrý syılyqtary berilýi múmkin ekendigin de aıtyp qaldy. Syılyqtar saılaý ýchaskesine alǵashqylardyń biri bolyp kelgen nemese saılaýǵa alǵash ret daýys bergen saılaýshylarǵa beriletin sııaqty.
– Bul – qoldaýǵa turatyn shara. Syılyqtyń qandaı jáne qanshalyqty mólsherde bolatyny jergilikti atqarýshy organdardyń múmkindikterine baılanysty, – dedi ol. – Biraq olarǵa eshqandaı da nusqaý berilgen joq. Estýimizshe, syı-sııapat uıymdastyrýdy qolǵa alyp jatqan saılaý ýchaskeleri de bar.
Álısultan QULANBAI.