Búgin tańerteńgi saǵat 10.00-de Ortalyq saılaý komıssııasynyń tóraǵasy Qýandyq Turǵanqulov 3 sáýirde ótken Qazaqstan Respýblıkasy prezıdentiniń kezekten tys saılaýynyń aldyn-ala qorytyndylaryn jarııalady. Aldyn ala anyqtalǵan osy qorytyndylardyń nátıjesi kórsetip otyrǵandaı, qazaqstandyqtardyń tańdaýy anyq ta aıqyn. Barlyq oblystardaǵy, Astana jáne Almaty qalalaryndaǵy búkil saılaý komıssııalarynan alynǵan jedel málimetter negizinde Ortalyq saılaý komıssııasy habarlaǵan málimetter tómendegideı.
Prezıdenttikke kandıdattar J.A.Ahmetbekovke saılaýshylardyń 1,4 paıyzy, M.H.Eleýsizovke saılaýshylardyń 1,2 paıyzy, Ǵ.E.Qasymovqa saılaýshylardyń 1,9 paıyzy, N.Á.Nazarbaevqa saılaýshylardyń 95,5 paıyzy daýys bergen.
Ortalyq saılaý komıssııasynyń tóraǵasy Q.Turǵanqulov bul áli saılaýdyń túpkilikti qorytyndysy emes ekenin basa aıtty. Hattamalar tolyq jınaqtalyp, alǵashqy naqty qorytyndy shyǵarý úshin saılaý zańnamasy boıynsha 2 kún ýaqyt beriledi. Al 3 sáýir kúni ótken kezekten tys Prezıdent saılaýynyń túpkilikti qorytyndylaryn Ortalyq saılaý komıssııasy aýmaqtyq saılaý komıssııalary hattamalarynyń negizinde saılaý ótken kúnnen 7 kún ótken soń, ıaǵnı 2011 jylǵy 9 sáýirden keshiktirmeı habarlaıtyn bolady.
Alǵashqy qorytyndylardyń ózi aıqyndap otyrǵandaı, Qazaqstan halqynyń qalaýy pash etildi. Árıne, túpkilikti qorytyndylar boıynsha paıyzdyq kórsetkishterde shamaly aýytqýlar bolatyndyǵy daýsyz. Biraq, tarıh aldynda óz qalaýyn aıqyndaǵan osynaý halyq tańdaýynyń endi ózgermeıtini anyq. Tańdaýynan taımaǵan halqymyzdy osynaý aıtýly oqıǵamen quttyqtaı otyryp, bolashaǵymyzdyń baıandy da berekeli bolatyndyǵyna zor senim artamyz.
P.S. Bet qattalyp jatqanda, ıaǵnı búgin túski 12-de Astanadaǵy «Qazaqstan» sport saraıynda Nursultan Nazarbaevtyń kezekten tys prezıdenttik saılaýda jarqyn jeńiske jetýine arnalǵan jeńimpazdar forýmy bastaldy. Forým jaıyndaǵy materıaldy gazettiń erteńgi nómirinen oqı alasyzdar.
Jylqybaı JAǴYPARULY.