Kádimgi Ahań – Ahmet Baıtursynovtyń kindik qany tamǵan áıgili Aqkól kóliniń jaǵasyndaǵy Qarasý, Aqkól aýyldarynyń turǵyndary sońǵy kúnderi alańdaýly. Qorasyndaǵy sıyrynyń qulaǵy kesilmegen úı kemde-kem bolyp tur. Qarasý aýylyndaǵy 17 úıdiń qorasynan 46 sıyrdyń qulaǵy shuntıyp qaldy. Sábıt Muqannyń on sıyrynyń qulaǵy kesilgen. «Sıyrǵa qulaq kerek emes bolsa, ony Alla taǵala da jaratpas edi-aý. Jazda shybynyn qaǵatyn qulaqtan aıyrý malǵa azar berýmen birdeı» dep otyr aýyldastar.
– Tańerteń qoraǵa kirsek, maldyń jartysynyń qulaǵy kesilgenin baıqadyq. Alǵashynda tipti óz kózimizge ózimiz senbedik. Bizdiń maldyń eni bulaı emes edi ǵoı dep oıladyq, baıqaı kelsek, qulaǵy birdeı kesilgen sıyrymyz on basqa jetti ǵoı. Biraq kózben kórip, qolmen ustap almaǵan soń, kimnen kórerińdi bilmeısiń, – deıdi Ásel Muqan. Eń qyzyǵy, esh jerge jáne maldyń ústine bir tamshy qan tambaǵan, qulaq buryn kesilgendeı, jara orny da bilinbeıtin kórinedi. Alǵashynda kesilgen qulaqty sol jerge tastap ketetin bolǵan, keıinnen qaldyrmaıtyn bolypty. Jezde, qaıyny bolyp ázildespese kóńili ortaıatyn aýyldyń qyljaqpastary deıin dese, bir úı emes, jıyrma shaqty úıdiń maly qulaqtan aıyryldy. Árıne, malǵa azar berý ázil-qaljyńnyń orny da emes qoı.
Malmen kún kórip otyrǵan aǵaıyn túnde kúzetip, tańerteń kózin ýqalap asha sala, qorasyna júgiretin boldy. Osy jaǵdaıdan qazir aýyldyq okrýg, jergilikti polısııa qyzmeti de habardar. Alaıda, sıyrdyń qulaǵyn keskenniń izi de tabylǵan joq. Aýyldastar kimnen kórerin bilmeıdi. Polısııa «qulaq kesetin qojalardy» izdeýmen aınalysqaly aýyl sıyrlarynyń qulaǵy da ázirge ornynda turǵan kórinedi.
Názıra JÁRIMBETOVA,
«Egemen Qazaqstan»
Qostanaı oblysy,
Jangeldın aýdany