...Kınoda – adal, teatrda – tákappar

Otandyq kınosúıer qaýym Ádildi jaqsy tanıdy. «Qara shańyraqtaǵy» sportshy jigit Dáýlettiń, «Astana – mahabbatym menińde» túrik qyzyna ǵashyq bolǵan sáýletshi Erlannyń beınesi, sondaı-aq, ótken jyly túsirilip, zor tabysqa jetken «Anaǵa aparar jolda» Ilııas beıneleri Ádildiń akter retinde keńinen tanylýyna jol ashty. Búginde Ádil Ahmetov Astanadaǵy Jastar teatrynyń beldi ártisi. Ádil T.Júrgenov atyn­da­ǵy Qazaq ulttyq óner akade­mııasynyń túlegi. Qazaqstannyń eńbek sińirgen qaıratkeri, rejısser Nurqanat Jaqypbaıdyń shákirti. Astananyń qaq tórinen Jastar teatryn ashýǵa zor eń­bek sińirgen ustazyn qatty qur­metteıdi. Ol úshin ónerine ózge jurtshylyqtyń bergen baǵasy bir tóbe de, ustaz­ynyń bergen baǵasy bir tóbe. Teatr men kı­nony bir-birinen bóle-jara qaras­tyrmaıdy. Biraq, kınodaǵy Ádil basqa da, teatrdaǵy Ádil múlde ózge jan. – Men kınoda kóbine sabyrly, baısaldy, aqyldy, adal, sol úshin de kópshilikke jaǵymdy beınelerdi oınaımyn. Al teatr­­­daǵy beınelerim kóbine tákap­par, minezdi, óz maqsaty úshin eshteńeden taısalmaıtyn jandar bolyp keledi, – deıdi ol. Kóp eńbektenip, kóp izde­netin, óz rólderin shyǵarý jolynda kitap oqyp qana qoımaı, tıisti salanyń mamandarymen de erin­beı-jalyqpaı áńgimelesip, barynsha shynaıy ról somdaıtyn Ádil Ahmetov ónermen tynystap, ónerge qyzmet etetin akter. Osyndaıda Tolstoıdyń «bir paıyz talant, toqsan toǵyz paıyz eńbek» degeni eske túsedi. Shynynda da myna ómirde talantty adamdar kóp qoı. Biraq solardyń bári birdeı tanymal ma? Talanttyǵa da, talantsyzǵa da tán jalqaýlyq degen jeksuryn qasıet bar. Ony kóbi jeńe almaıdy. Jeńgen kúnde de «barmaqtaı baǵy» bolmasa taǵy beker. Bul turǵydan Ádil ári tynymsyz izdenistiń adamy, ári barmaqtaı baǵy bar jigit. Qarańyz, akter teatr sahnasynda «Dılıafrýzdyń tórt kúıeýinde» Smaǵuldyń, «Revı­zorda» dýanbasy Anton Antonovıchtiń, «Shyńǵyshan» spektaklinde Shyńǵyshannyń, «Asaýǵa tusaýda» Petrýchıonyń, «Mekkege qaraı uzaq jolda» Adam Imperatordyń, «Jan azabynda» Ámirshiniń rólderin somdaıdy. Kınodaǵy joǵaryda aıtqanymyzdan bólek rólderi – «Qaljadaǵy» Dastan, «Jaý júrek – myń baladaǵy» Raıym­bek, «Lavedegi» Ádil, «Aldar kósedegi» Qasym han, «Sena svobody» kartınasyndaǵy As­hat, «Paryzdaǵy» Asan. Bul tizimdi shubyrtyp ne úshin jazyp otyrmyz? 33 jastaǵy akter osy ýaqyt­qa deıin osynshama rólge endi, daıyndyqta, sahnada, túsirý alańynda bul adamdardyń ómirin súrdi. Bul beınelerdiń sezim-kúılerin bastan keshti. Jastyq jalynmen, ómirge qushtarlyqpen, ónerge ǵashyqtyqpen somdal­ǵan osy beıneler Ádildiń tanymal­dylyǵyna, kıno álemindegi ózindik órnegine jol ashpady dep kim aıta alady? Ádildiń bala jastan ónerge ǵashyqtyǵyn kórsetetin mynadaı bir qyzyqty sıýjet bar. 6 synypta oqıtyn bala óz úıiniń qorasyndaǵy jylqy, sıyrlardy, úırekter men taýyqtardy kameraǵa túsirip júr. Olardyń kameradaǵy beınelerine qarap tam­sanady, óziniń «ónerine» súısinedi. Ata-ájesine maqtanyp kórsetip qoıady. Astanadaǵy Jastar teatry   «Abylaı han» spektaklin qoıýǵa daıyndyq ústinde. Aqpannyń sońyna qaraı sahnaǵa shyǵatyn sol spektaklde keıipkerimiz Abylaı handy somdamaq. Al kınoǵa túsý týraly da usynys barshylyq. Tek ol usynystarǵa beınelerdi oı eleginen ótkizip, jaqsylap saraptap bolǵan soń ǵana jaýap berilmek. Aıgúl SEIILOVA, «Egemen Qazaqstan»