QR Investısııalar jáne damý mınıstrliginiń qurylys jáne turǵyn úı sharýashylyǵy jónindegi komıtet tóraǵasy Marhabat Jaıymbetovtń aıtýynsha, aldaǵy 15 jyldyń ishinde «Nurly jer» memlekettik baǵdarlamasy boıynsha kezekte turǵan azamattarǵa 630 myń jer ýchaskesin taratý josparlanyp otyr, dep habarlaıdy Qazaqparat.
«Jer beriledi. Biraq ol jerge ınjenerlik jeliler tartylýy qajet. Elbasynyń tapsyrmasy boıynsha jyl saıyn 80 mlrd teńge sol ınfraqurylymdy tartýǵa bólinip jatyr. Ondaı qarjy birinshi ret berilip otyr. Bıyl ol qarajattyń kólemi 80 mlrd-tan kóp, 86 mlrd berýdemiz. Aqshany ákimdikterge úlestirdik. Endi olar ınjenerlik jelilerdi tartyp, halyqqa berýi kerek», - dedi Jaıymbetov.
Komıtet basshysynyń aıtýynsha, ótken jyly 100 mlrd-tan astam qarjy bólingen. Osy aqshaǵa 110 myń jer ýchaskesine ınfraqurylym tartylýy qajet.
«Endi, sol 110 myń ýchaskeniń shamamen 53 myńy - buryn berilgen jerler (ol jerler ınjenerlik jelilersiz berildi). Al 47 myń jer ýchaskesi jańadan jasaqtalýy shart. Bıylǵa taǵy 86 mlrd. teńge, sóıtip aǵymdaǵy jyly ol jumysty (jańa ýchaskelerdi jasaqtaýdy - avt.) aıaqtaıdy. Osylaısha, bizdiń josparymyzǵa sáıkes, respýblıka boıynsha jyl saıyn 42 myń jer ýchaskesi taratylady. Al aldaǵy 15 jyldyń ishinde 630 myńdaı ýchaske beriletini kútilýde. Bıyl ákimdikter jańaǵy aıtqan 47 myń jer ýchaskesiniń ınfraqurylymyn aıaqtaýy tıis. Endi, qarjy bólinse, odan da kóp bolady», - dep atap kórsetti Jaıymbetov.