Fırýza Sháripova: EXPO-2017 kezinde sharshy alańǵa shyqqym keledi

Qazaqstandyq kásipqoı boksshy qyz Fırýza Sháripova EXPO-2017 kezinde álem chempıony atanýdy armandaıtynyn málimdedi. Bul týraly vesti.kz habarlady. «EXPO-2017 kezinde ótetin boks keshine qatysýdy armandaımyn. Sondaı-aq, jospar boıynsha sol ýaqytta tıtýldy jekpe-jek ótkizýim kerek. О́z elimde, jankúıerlerimniń kóz aldynda álem chempıony atanǵanǵa ne jetsin, shirkin! Ǵalamtorda osy ıdeıany qoldap pikir jazǵandardy oqyǵanda keremet bir kúıde qalamyn», – dedi Sháripova. «Menedjerim ekeýimizdiń oıymyz bir jerden shyqty. Degenmen, EXPO-2017 uıymdastyrýshylarynyń tarapynan ázirge eshqandaı usynys túsken joq. Baspasóz betterinde jazylǵandaı, kópshilik ataqty boksshylarmen aıqasqanymdy qalaıdy. Jekpe-jegim boks keshiniń sánin kirgizedi dep oılaımyn», – dedi boksshy qyz. «Uıymdastyrýshylar tarapynan usynys kútip júrmiz. Al ózimiz tyńǵylyqty túrde daıyn bolýǵa ári chempıondyq ataq úshin kezdesý ótkizýge ýáde beremiz. О́z elimde chempıon ataný úshin barymdy salamyn», – dedi Fırýza.