Paıdaly qazbalardyń óndirilýine baılanysty Vesovaıa, Krestovskıı jáne Perevalka kentteriniń turǵyndary jańa jerge kóshiriledi, dep habarlaıdy «QazAqparat».
Sátbaev qalasynyń keshendi damý josparyna sáıkes, úsh kenttiń turǵyndary «Nurly meken» jańa móltekaýdanyna kóshiriledi. Al, olarǵa tıesili jer telimderi paıdaly qazbalar óndirý maqsatynda memlekettiń qaramaǵyna ótedi. Qaraǵandy oblysynyń ákimi Nurmuhambet Ábdibekov halyqqa esep berý kezinde habarlaǵandaı, aýyl turǵyndaryn kóshirý úshin bes qabatty 25 turǵyn úı turǵyzylady.
«Qazirgi tańda 859 otbasyny turǵyn úımen qamtamasyz etý úshin 39 turǵyn úı salynyp, alty páter satyp alyndy. 1150 otbasy úshin jalpy aýmaǵy 78 myń sharshy metrlik bes qabatty 25 úı salynýda. Qurylys jumystary 2017 jyly aıaqtalady», - dep málimdedi Qaraǵandy oblysynyń ákimi.
«Nurly jer» baǵdarlamasyn júzege asyrý úshin bir jarym mıllıard teńge bólindi. 19 myń sharshy metrlik turǵyn úı qúrylysy josparymyzda bar. Bul kezekte turǵan 336 januıany baspanamen qamtamasyz etýge múmkindik beredi.
«Qazaqstannyń turǵyn úı qurylys jınaq banki» AQ salymshylary úshin, sonyń ishinde jergilikti atqarýshy organdarda jumys jasaıtyn kezekte turǵandarǵa nesıelik úı qurylysy jalǵasady. Qazirgi tańda osyndaı turǵyn úıdiń qurylysyna arnalǵan 11 joba bar», - dedi Nurmuhambet Ábdibekov.