Bilim jáne ǵylym mınıstrliginde barlyq aımaqtarmen tikeleı baılanysta, beıne konferensııa rejiminde Balalar úıleri janyndaǵy biryńǵaı respýblıkalyq qamqorshylar keńesiniń otyrysy ótti.
Balalar úılerinde tárbıelenýshi balalardyń ómirin jaqsartý, olardyń quqyqtarynyń buzylýyna jol bermeý, sondaı-aq balalardy Qazaqstan azamattarynyń otbasylaryna berip, ata-ananyń jylylyǵy men meıirimin kórip ósetin otbasyǵa qaıtarý boıynsha jumystardy jetildirýdi basty nazarynda ustaıtyn Keńes otyrysynda Bilim jáne ǵylym vıse-mınıstri Bıbigúl Asylova: «Búginnen bastap jetim balalarǵa arnalǵan bilim berý mekemeleri janyndaǵy qamqorshylyq keńesteri óz jumysyn bastady deýge bolady. Keńester quramyna úkimettik emes uıymdar, memlekettik organdar, saıası partııalar, bıznes ókilderi, demeýshiler men mesenattar endi» deı kele, balalardyń otbasynda tárbıelený quqyǵyn júzege asyrý úshin jumystardyń belsendi túrde júrgizilýine mán berý kerektigin basa aıtqan. Bul rette, qamqorshylar keńesi ýákiletti organdarmen birlese otyryp, bala qabyldaıtyn otbasylardy daıyndaý boıynsha talaptardy, sondaı-aq balalardy balalar úıinen qabyldaıtyn otbasyǵa berýdi daıyndaýdyń tıimdi tásilderin jetildirýde izdenisterge qoldaý kórsetý boıynsha kóptegen oıdy ortaǵa saldy.
Jıynda aıtylǵandaı búgingi tańda balany óz otbasynda tárbıeleýge alǵysy keletin otbasylar úshin, ata-ana qamqorlyǵynsyz qalǵan balalar men jetim balalardyń respýblıkalyq málimetter bazasy qurylyp, balalardy otbasyna oraltýda zańnamamen ornalastyrýdyń jańa túrleri anyqtalǵan eken. Ol – bala qabyldaıtyn otbasy, bala qonaqtaıtyn otbasy (kanıkýl kezeńderinde, demalys jáne mereke kúnderi balalardy ýaqytsha ornalastyrý túri) syndy zańnamalyq turǵyda belgilengen tártipter. Aıta ketý kerek, elimizde ata-ana qamqorlyǵynsyz qalǵan balalar sany jyldan-jylǵa azaıýda, ótken jyly balalar men jetim balalarǵa arnalǵan uıymdarda 8066 bala tárbıelense, 2017 jyldyń 1 qańtarynda olardyń sany 7236 bolyp, balalar sanynyń azaıýyna baılanysty arnaıy mekemeler jelisi de qysqarǵan. Iаǵnı jetim balalarǵa arnalǵan uıymdar júıesi 48 birlikke azaıǵan kórinedi (188-den 140-qa deıin).
Otyrys bastalmas buryn jýrnalıster saýalyna jaýap bergen mınıstrdiń balalar quqyqtaryn qorǵaý boıynsha keńesshisi Bálııa Ákimbekova qamqorshylyq keńes músheleriniń 40 paıyzyn úkimettik emes uıymdar kuraýy qajettigin, Keńestiń tóraǵasy da úkimettik emes uıymnyń ókili bolǵany jón ekenin aıtqan. «Qazirgi ýaqytta Bilim jáne ǵylym mınıstrligi qamqorshylyq keńesterin qurý boıynsha tıisti erejelerdi ázirlep qoıdy. Jaqyn arada atalǵan erejelerdi bekitý josparlanyp otyr. Jalpy, zańnamada bilim berý mekemeleri janynan qamqorshylyq keńesterin qurý normasy bar» degen ol keńes jumysynyń jalpy qoǵamǵa ashyq bolatynyn, aqparattardyń jarııalylyǵy qamtamasyz etiletinin jetkizgen.
Keńes quramyna qoǵamdyq uıymdardyń ókilderi, balalardyń quqyqtaryn qorǵaý qory, qabyldaýshy ata-analar assosıasııasy, basqarý organdary (onyń ishinde quqyq qorǵaý organdary), partııa jáne «Atameken» UKP músheleri enip, biryńǵaı respýblıkalyq qamqorshylar keńesiniń kelesi otyrysy endi 6 aıdan soń ótkizilip, otyrysta keńestiń sol ýaqyt aralyǵynda atqarǵan jumysynyń qorytyndysy tyńdalyp, barlyq buqaralyq aqparat quraldary men BǴM jáne Balalardyń quqyqtaryn qorǵaý komıtetiniń saıtynda, ınternet-resýrstarda jarııalanady dep sheshildi.
Anar TО́LEÝHANQYZY,
«Egemen Qazaqstan»