О́tken jumada tań atpaı elimizdiń eń shalǵaıyndaǵy Jarkent qalasyna qaraı attandyq. Almatydan shyqqanda qar qylaýlap tursa da, kúni jarqyraǵan Jarkentte aýa raıy kádimgideı bólek ekendigi baıqalady. Aptanyń jaqsy kúninde bizdi bul qalaǵa bastap kelgen oqıǵanyń úlkeni «QazTransGaz» AQ óziniń ınvestısııalyq seriktesi «APL Construction» JShS birlesip, Almaty oblysyndaǵy Jarkent qalasyna kógildir otyndy kirgizýi bolatyn.
Jarkenttikter tarıhı kún dep eseptegen osy jumada ulttyq operator gaz qubyry men avtomattandyrylǵan gaz taratý stansasyn (AGTS) salyp, iske qosty. Qazir aýdan ortalyǵyndaǵy alǵashqy abonentter gazǵa qosylyp jatyr. Osyny kózben kórip, halyqqa jetkizý úshin barǵan bir top BAQ ókilderin de ot jaǵyp, kúl shyǵarmaı-aq alaýlaǵan gazǵa pisken bylqyldaǵan baýyrsaqtardyń dámi tartqan sııaqty.
Gaz alaýyn jaǵatyn saltanatty sátke qala turǵyndary, gaz taratý stansasynyń jumysshylary da qýana qosylyp, turmystyń bir taýqymeti bolsa da azaıǵanyna shynaıy alǵystaryn bildirip jatty.
Aýqymdy jobanyń atqarylýyna arnalǵan saltanatty rásimde «QazTransGaz Aımaq» AQ Almaty óndiristik fılıalynyń dırektory Shalqar Omarbekov, Almaty oblysy Panfılov aýdany ákiminiń orynbasary Dýman Tórehanov, osy jobaǵa ınvestorlyq qarajat quıǵan «APL Construction» kompanııasynyń dırektory Aleksandr Gılmanǵa sóz berildi. Bul kisilerdiń barlyǵynyń sózi bir jerden shyqqany aıan. Báriniń de kózdegeni – tynysh elde tatý turmys keship, turmysymyzdy jaqsarta berýge qyzmet etý.
Osydan keıin arnaıy qurylǵy arqyly kógildir alaý tutanyp, nysandardyń iske qosylar kezinde osy aýdannyń qurmetti azamaty Sháriphan qajy Turǵanov aqsaqaldyq batasyn berdi. El yqylasymen bataǵa qol jaıdy.
Qala turǵyndary kópten kútken bul joba «QazTransGaz» AQ pen Almaty oblysy ákimdigi jáne «APL Construction» JShS arasynda qol qoıylǵan Almaty oblysynyń Panfılov jáne Eńbekshiqazaq aýdandaryn gazdandyrýdy kózdeıtin ózara yntymaqtastyq týraly memorandým aıasynda júzege asyryldy. Memorandýmǵa sáıkes QazTransGaz kompanııasy Qazaqstan-Qytaı magıstraldy gaz qubyrynan jetkizýshi qubyr tartyp, Jarkent pen onyń aınalasyndaǵy eldi mekenderge jáne «Qorǵas-Shyǵys qaqpa» arnaıy ekonomıkalyq aımaǵyn jabdyqtaýǵa qýaty jetetin avtomatty gaz taratý stansasyn saldy. Al jeke ınvestor «APL Construction» seriktestigi qala men aýylishilik qubyrlardy salyp, tutynýshylardy gazǵa qosý jumystaryn bastap ketti.
Qoldanysqa berilip otyrǵan «Jarkent» AGTS-pen gaz qubyrlary aýdan ortalyǵynyń 43 myńnan astam turǵyny men 161 óndiristik jáne kommýnaldyq-turmystyq kásiporyndy tabıǵı gazben jabdyqtaýǵa arnalǵan.
Júzege asyrylyp otyrǵan jobalar bolashaqta Almaty oblysy Panfılov aýdanynyń Úsharal, Sholaqaı okrýgteri men ózge de eldi mekenderin gazdandyrýǵa múmkindik jasaıdy, bul óz kezeginde aýdandaǵy kishi jáne orta bıznes, óndiristiń túrli salalarynyń damýyna serpin berip, jańa jumys oryndarynyń ashylýyna jaǵdaı týǵyzady dep kútilýde.
Ulttyq operator aldaǵy ýaqytta tabıǵı gaz resýrstarynyń qajetti kólemin qamtamasyz etýdi jalǵastyra bermek. Máselen, gazdandyrýdyń bas kestesine sáıkes, jalpy 900 myńdaı turǵyny bar Almaty oblysynyń 228 eldi mekenin gazdandyrý josparlanyp otyr. Osydan keıin óńirdiń gazdandyrylý deńgeıi 41%-ǵa jetetin bolady.
Iri tranzıttik jáne magıstraldy gaz qubyrlary Almaty oblysy arqyly ótkenimen, búgingi tańda gazdandyrý deńgeıi boıynsha Almaty oblysy nashar damyǵan aımaqtardyń biri sanalady. Sondyqtan, «QazTransGaz» AQ jáne jeke ınvestordyń atsalysýymen atqarylǵan osy ıgilikti isti ınfraqurylymdyq jobalardy júzege asyrýdaǵy memleket-jekemenshik áriptestiginiń sátti kórinisi deýge tolyq negiz bar.
Aınash ESALI,
«Egemen Qazaqstan»
ALMATY – JARKENT – ALMATY