Al Aqtaý aýyly – mal sharýashylyǵyn damytý, onyń ishinde et, sút óndirý, mal azyǵyn daıarlaý baǵytynda Jańaarqa aýdanynyń ekonomıkasyn alǵa súırep otyrǵan strategııalyq mańyzy zor eldi mekenniń biri.
Aqtaý Jańaarqa aýdanynyń ortalyǵy – Atasýdan 122 shaqyrym qashyqtyqta ornalasqan, kóterme jol arqyly qatynas jasaıdy. 1964 jyly salynyp, respýblıkalyq mańyzy bar joldar sanatyna engen osy joldyń búgingi tańda sapasy nasharlap, talapqa saı emestigi aýdan jáne aýyl turǵyndaryn aıtarlyqtaı alańdatyp otyr. Atap aıtar bolsaq, 2014 jyly atalǵan joldyń bir bóligin sý shaıyp, joldyń negizi jaramsyz bolyp qalǵandyqtan, qazirgi tańda onymen júrý úlken qıyndyqtar týǵyzýda, al búgingideı kóktem aılarynda avtokólikpen júrý múldem múmkin emes.
Bul jol arqyly Aqtaý aýylynyń turǵyndary ǵana emes, oblystyq mańyzy bar keleshegi jarqyn monoqala jobasyna engen qalalardyń biri bolyp tabylatyn Qarajal qalasynyń turǵyndary da aýdan ortalyǵy – Atasý kenti men oblys ortalyǵy – Qaraǵandy qalasyna qatynaıdy. Osy jolmen kólikpen júrý múmkin bolmaýyna baılanysty Qarajal qalasynyń turǵyndary oblys ortalyǵyna Jáırem kenti arqyly aınalma jolmen 420 shaqyrym júrip jetýge májbúr. Al bul óz kezeginde Qarajal qalasynyń turǵyndaryna, joǵaryda aıtyp ketkenimizdeı, aýdan ortalyǵy men oblys ortalyǵyna jetýde úlken qıyndyqtar týǵyzyp otyr.
Aqtaý aýyly men Qarajal qalasynyń keıingi jyldary qaıta órkendep, ondaǵy turǵyndar sanynyń artýy negizge alyna otyryp, Atasý – Aqtaý – Qarajal baǵytyndaǵy kóterme jol kúrdeli jóndeýden ótkizilgen jaǵdaıda, Qarajal qalasy men Aqtaý aýylynyń Jańaarqa aýdanymen ózara baılanysy jaqsaryp, oblystyń ishki áleýeti artar edi ári eki aımaqtyń bir-birimen saýda-sattyǵy, ekonomıkalyq baılanystary nyǵaıyp qana qoımaı, joldyń oblystyń kólik-logıstıkalyq ınfraqurylymyn damytýǵa qosar úlesi de zor bolary sózsiz edi.
Men Úkimet basshysy Baqytjan Saǵyntaevtan osy kóterilgen máseleniń ózektiligin eskere otyryp, Qaraǵandy oblysyndaǵy Atasý – Aqtaý – Qarajal baǵytyndaǵy kóterme joldy kúrdeli jóndeýden ótkizýge qarjy qarastyrýdy suradym. Bul saýaldy áriptesterim M.Altynbaev pen S.Ershov ta qoldap, oǵan óz qoldaryn qoıǵanyn aıta keteıin.
Serik AQYLBAI,
Senat depýtaty