Astanada «Amanat» partııasy janyndaǵy Múgedektigi bar adamdardyń ınklıýzııasy jónindegi respýblıkalyq keńes otyrysy ótti. Jıyn barysynda erekshe bilim berýdi qajet etetin balalardy jáne múmkindigi shekteýli balalardy arnaıy psıhologııalyq-pedagogıkalyq súıemeldeý nysandarymen qamtý, sondaı-aq oqý baǵdarlamalary men jumys josparlaryn beıimdeý máseleleri, tehnıkalyq, kásiptik bilim berý júıesinde ınklıýzıvti bilim berýdi damytý sharalary qaraldy.
Is-sharaǵa Májilis depýtattary, ortalyq memlekettik organdardyń ókilderi, partııa qyzmetkerleri jáne beınekonferens-baılanys rejimi arqyly óńirlerdegi basqarma basshylary qatysty.
Sóz basynda «Amanat» partııasynyń hatshysy Sholpan Karınova elimizde jańa Konstıtýsııa jobasy ázirlengenin, osy jumys ashyq ári jarııa túrde júrgizilgenin atap ótti.
«Ár azamattyń Qazaqstannyń bolashaǵyna óz úlesin qosýǵa belsendi azamattyq ustanymyn usynystar men sanaly qatysýy arqyly bildirýge tolyq múmkindigi bar. Ata zań jobasy qoǵamda júzege asyrylyp jatqan júıeli saıası jáne ekonomıkalyq ózgeristerdi kórsetip, el damýynyń jańa baǵdaryn, onyń ishinde bilim, ǵylym, ınnovasııalar salasyndaǵy basymdyqtardy aıqyndap, adam kapıtalyn damytýdy eń basty orynǵa qoıǵan qujat sanalady», dedi partııa hatshysy.
О́z kezeginde, Májilis depýtaty, keńes tóraǵasynyń orynbasary Erlan Ábdıev jańa Konstıtýsııa jobasy – bolashaqqa baǵyttalǵan, progressıvti qujat ekenin atap ótip, onyń irgetasynda adamǵa baǵdarlanǵan ustanym ekenin málimdedi. Onyń aıtýynsha, bul qoǵamda ınklıýzıvti ortany damytýda, sonyń ishinde Qazaqstannyń bilim berý júıesin ilgeriletýde erekshe mańyzdy.
«Búginde ulttyq deńgeıde «Múmkindigi shekteýli balalardy (tulǵalardy) keshendi qoldaý týraly» jańa zań jobasy ázirlenip jatyr. Qujat Memleket basshysynyń Ulttyq quryltaıdyń IV otyrysynda bergen tapsyrmasy aıasynda Májilis pen Senat depýtattarynyń bastamasy negizinde daıyndaldy. Májiliste talqylanyp jatqan bul zań jobasy balalardyń medısınaǵa, bilimge jáne áleýmettik qyzmetterge úzdiksiz qoljetimdiligin qamtamasyz etýge múmkindik beredi», dedi Erlan Ábdıev.
Bul rette Oqý-aǵartý birinshi vıse-mınıstri Maıra Meldebekova elimizde erekshe bilim berýdi qajet etetin 237 myń bala bar ekenin aıtty.
«Onyń ishinde, mektepke deıingi jasta – 71 myń, mektep jasynda – 166 myń. Múmkindigi shekteýli balalardyń basym kópshiligi – psıhıkalyq damýy tejelgen balalar. Olardyń úlesi – 34,3% bolsa, sóıleý tiliniń buzylysy bar balalar 32%-dy quraıdy. Búginde ınklıýzıvti bilim berý jaǵdaıynda balabaqshalarda – 49200, mektepterde – 138700, kolledjderde 5400 bala bilim alýda. Ár balanyń bilim alý qajettiligi psıhologııalyq medısınalyq pedagogıkalyq konsýltasııalarda (PMPK) baǵalanady. Ol úshin elimizde 124 PMPK qyzmet etedi. Osy jyly taǵy 8 PMPK ashý josparlanyp otyr», dedi vıse-mınıstr.
Sondaı-aq jıyn barysynda Qaraǵandy men Aqmola oblysyndaǵy jáne Shymkent qalasyndaǵy bilim basqarmalarynyń basshylary baıandama jasady.
Is-sharany qorytyndylaı kele, «Amanat» partııasynyń hatshysy Sholpan Karınova aldaǵy ýaqytta qabyldanatyn barlyq sheshim men sharanyń ózeginde balalar turýǵa tıis ekenin atap ótti. Al túpki maqsat – naǵyz ınklıýzıvti orta qurý.
«Sanıtarlyq jáne qurylys normalary da nazardan tys qalmaýǵa tıis. PMPK-ǵa, ońaltý kabınetterine jáne resýrstyq ortalyqtarǵa qatysty tıisti qurylys normalary qajet. Osy másele áli de tolyq sheshimin tappaı otyr. Sondyqtan jıyn barysynda kóterilgen barlyq máseleni aldaǵy ýaqytta da jiti nazarda ustaımyz», dep túıindedi Sholpan Karınova.