HVIII ǵasyrda jońǵarlarǵa qarsy kúresken batyr, mámileger Jánibek Qoshqaruly ustaǵan týdyń jurnaǵy Torǵaıdaǵy mýzeıler keshenindegi qadirli jádigerdiń biri. Buqar jyraýdyń «Qara kereı Qabanbaı, qanjyǵaly Bógenbaı, Qaz daýysty Qazybek, Shaqshaquly Jánibek, ormandaı kóp Orta júz, sodan shyqqan tórt tirek» degen dýaly sózinen-aq, Jánibek batyrdyń óz zamanynda qandaı iri tulǵa bolǵandyǵy baıqalady. Sol Jánibek batyrdyń jaýǵa qarsy shapqanda alyp shyqqan sary týynyń qıyndysy búginge jetipti. Mýzeıler kesheniniń dırektory Gúlbaný Sársekeeva týdyń HH ǵasyr basyna deıin bútin bolǵanyn aıtady.
− Torǵaıdaǵy quımaqulaq aqsaqaldardan jetken áńgimeler boıynsha, osy tý HH ǵasyrdyń bas kezindegi alasapyran ýaqytta Jánibek batyrdyń shópshegi, Sholaqtyń Ospany degen kiside bolǵan eken. Keıin osy týdy kópshilik emes pe, tábárik kórip, jyrta bastaıdy ǵoı. Sol týdyń qıyndysy ǵana bizge 1993 jyly mýzeı ashylǵanda jetti, – deıdi Gúlbaný Sársekeeva.
Týdyń qıyndysyn mýzeıge Almatyda turatyn, búginde 90 jasqa kelip otyrǵan Ǵalııa Bektemisova degen ájemiz tapsyrypty. Jádigerdiń onyń qolyna túsýi de qyzyq. О́tken ǵasyrdyń 50-jyldary Jánibek batyrdyń urpaqtary bolyp keletin torǵaılyq, belgili baspager Ábdiráshıt Bektemisov týǵan jerine qydyrystap barady. Kelinshegi Ǵalııa ekeýiniń otbasynda náreste bolmaı júr eken. Sonda torǵaılyq bir aqsaqal olarǵa osy týdyń jurnaǵyn «batyr babańnan qalǵan qasıetti zat edi, alyp ket, kelin ul tabar» dep yrymdap beripti.
− Rasynda, Almatyǵa barǵan soń Ǵalııa apamyz bala kóterip, ul tabady, onan keıin ómirge qyz bala keledi. Biraq uly qyzylshadan shetinep ketedi de, qyzy aman ósedi. Qazir anasy sol qyzdyń qolynda. Mýzeı ashylǵanda Ǵalııa ájeı jádigerdiń osy tarıhyn aıtyp, tapsyryp edi, – deıdi Gúlbaný.
Týdyń jurnaǵyn kelýshiler uzaq qyzyqtap turady. Onyń qandaı matadan jasalǵany mýzeı qyzmetkerlerine ázir belgisiz. Bir qaraǵanda toqylýy kenep tárizdi. Ǵasyr qoınaýynan jetken týdyń qıyndysy uly dalany qorǵaǵan, at ústinde kóz shyrymyn alǵan, tulpary aýyzdyqpen sý ishken batyrlar erliginiń kýágeri ekeni sózsiz.
Názıra JÁRIMBETOVA,
«Egemen Qazaqstan»
Qostanaı oblysy,
Jankeldın aýdany