Qaraǵandydaǵy Maqajanov atyndaǵy emhanada Ulybrıtanııanyń buqaralyq oqıǵalar kezinde medısınalyq kómek kórsetý máseleleri jónindegi tótenshe jaǵdaılar boıynsha vedomstvosynyń keńesshisi Robert Dobson baıandama jasap, dárigerlerge tótenshe jaǵdaılar, teraktiler men iri jol-kólik oqıǵasy kezinde qalaı áreket etý kerektigin aıtyp berdi. Sheteldik mamannyń dárisin tyńdaýǵa hırýrgter men ortopedter keldi.
Dáriger Dobson medısınalyq sharalarǵa emes, jedel járdem karetalarynyń ornalasýyna jáne zardap shekkenderdi durys tasymaldaýǵa nazar aýdartty. Dárigerlerdiń, polısııa qyzmetkerleriniń jáne oqıǵa ornyndaǵy dárigerlerdiń qaýipsizdigin qamtamasyz etetin jáne olarǵa kómektesetin qutqarýshylar kooperasııasynyń mańyzdylyǵyn atap ótti. Mysal retinde jaqynda Londonda Vestmınster kópirinde oryn alǵan terakti kezinde túsirilgen kadrlardy paıdalandy.
Ol Qaraǵandyda osymen ekinshi ret dáris oqydy. Oblys ortalyǵyna bes jyl buryn kelgen. Sol kezde jedel járdem ortalyǵynda bolyp, feldsherler jumysynda qoldanatyn jabdyqtardy kórgen. Onyń aıtýynsha, brıtandyq mamandar zamanaýı tehnıkany paıdalanady. Sodan beri bizdiń dárigerler de jańa reanomobılder aldy. Maqajanov atyndaǵy klınıka stasıonarynyń bas dárigeri Berik Tileýbaevtyń aıtýynsha, endi brıtandyq jabdyqtarmen aradaǵy aıyrmashylyq asa baıqalmaıdy. Sheteldik maman qýanyshyn jasyrmady, óıtkeni zardap shekkenderdiń ómirin tasymaldaý sátinen bastap qolǵa alý kerek, kóp jaǵdaıda pasıenttiń aman qalýy osyǵan baılanysty bolady.
– Biz dáriger Dobson aıtyp bergen júıeni engizemiz, – deıdi Berik Erkebulanuly. – Árıne, ony quqyq qorǵaý organdarymen pysyqtaý kerek. Bul bizdiń klınıkada ǵana emes, búkil oblysta da bolady. Keńestik jyldary dalalyq jaǵdaılarda medısınalyq kómek kórsetý erejeleriniń jıyntyǵy bolǵan. Búginde ol erejeler eskirdi. Endi jańalyqtar engizý kerek, osy maqsatta Eýropanyń tájirıbesin qabyldaımyz, – deıdi bas dáriger.
Mıras ASAN,
«Egemen Qazaqstan»
Qaraǵandy