Prezıdent tapsyrmasyna oraı «Taza Qazaqstan» jalpyulttyq aksııasy aıasynda Abaı ýnıversıteti men Ile-Alataý memlekettik ulttyq tabıǵı parki arasynda ekologııalyq jobalardy iske asyrý boıynsha kelisim jasaldy, dep habarlaıdy Egemen.kz.
Ulttyq ýnıversıtet basshylyǵymen kezdesýinde «Ile-Alataý memlekettik ulttyq tabıǵı parkiniń bas dırektory Elnur Ahmetov «Taza Qazaqstan» jobasy aıasynda birlese atqarylatyn jumystarǵa toqtalyp, ortaq usynystar men josparlar talqylady.
Jalpyulttyq joba sheńberinde iske asatyn jobalar jastar arasynda ekologııalyq mádenıetti qalyptastyryp, qorshaǵan ortany qorǵaý, tazalyqty nasıhattaýmen baılanysty bolmaq. О́z kezeginde ýnıversıtet basshylyǵy «Taza Qazaqstan» jobasy aıasynda oqý ornynda iske asyp jatqan ekologııalyq ǵylymı zertteýlerge toqtaldy.
Kezdesýde Ulttyq parkti tájirıbe alańyna aınaldyrý máselesi qozǵalyp, tabıǵı nysandar, bıoalýantúrlilik pen ekojúıelerge qatysty málimetterdi taldaý arqyly stýdentterdiń zertteý qabiletterin arttyrý, birlesken oqý-ádistemelik quraldardy birlesip ázirleý barysy talqylandy. Munymen qosa Ulttyq parktiń derekter qoryn ǵylymı aınalymǵa engizip, oqý úderisinde paıdalaný máselesi de aıtyldy.
Eki jaq birlesken jobalardy iske asyrý maqsatynda memorandýmǵa qol qoıdy. Endigi kezekte Ile-Alataý ulttyq parkiniń týrıstik áleýetin arttyrýǵa baǵyttalǵan jobalar aıasynda stýdentter jańa tehnologııalardy paıdalana otyryp, ekologııalyq, tanymdyq jáne týrıstik baǵyttaǵy bastamalardy júzege asyratyn bolady. Aldaǵy ýaqytta stýdentter ekologııany jaqsartýǵa arnalǵan sıfrlyq jobalardy iske asyratyn bolady.