23 naýryz Naýryznama onkúndiginiń sońǵy kúni – Tazarý kúni. Osy mańyzdy kúnge oraı Memleket basshysy Qasym-Jomart Toqaev Qazaqstan halqyna úndeý jasady, dep jazady Egemen.kz.
Búgin Tazarý kúnine oraı elimizdiń ár túkpirinde «Taza Qazaqstan» jalpyulttyq jobasynyń jańa kezeńine jol ashatyn aýqymdy ekologııalyq aksııa bastaldy.
Prezıdent: Halqymyzdyń tarıhı taǵdyry – ózimizdiń qolymyzda
Prezıdent Naýryznama onkúndiginde aıryqsha oryn alatyn Tazarý kúninde azamattardy tazalyq pen tártip estafetasyna belsene qatysýǵa shaqyrdy.
«Qoǵamymyzdyń jańǵyrýy kúlli tabıǵattyń jańarýymen tuspa-tus kelip otyr. Ýaqyt pen irgeli ózgeristerdiń osylaı úndesýi barshamyzǵa Otanymyzdyń ıgiligi jolynda aıanbaı eńbek etýge aıryqsha kúsh-jiger beretini sózsiz.Respýblıka aýmaǵynda «Móldir bulaq» bastamasyn jappaı júzege asyrý qolǵa alyndy. Bul joba aıasynda bulaqtardyń kózin ashyp, tal egý, jaǵalaýlar men sý aıdyndaryn, aýlalar men saıabaqtardy tazalaý jumystary jalǵasa beredi.Naýryz meıramy kezinde qabyldanǵan Jańa Halyq Konstıtýsııasynda azamattarymyzdyń tabıǵatqa qamqorlyqpen qaraýy ulttyq dúnıetanymymyzdyń basty qaǵıdatynyń biri retinde aıqyndalǵan. Jańa Halyq Konstıtýsııasy el birliginiń arqaýy, rýhanı jáne quqyqtyq baǵdarymyz ári Táýelsizdigimizdiń myzǵymas tuǵyry bolatyny kúmánsiz. Ata zańymyz qoǵamda dúnıetanymymyz ben bitim-bolmysymyzdyń ózegi sanalatyn yntymaq, jaýapty ári jasampaz otanshyldyq, sondaı-aq «Taza Qazaqstan» qundylyqtaryn qalyptastyrady. «Taza Qazaqstan» ıdeologııalyq tujyrymdamasynyń túpki máni kóshelerdi, aýlalardy jáne aınalamyzdy taza ustaýdan ǵana emes, Qazaqstan azamattarynyń ál-aýqatyn arttyrýǵa bastaıtyn nıet pen peıildiń tazalyǵynan kórinis tabady. Otandastarymyzdy Tazarý kúnimen quttyqtaımyn! Qazir tabıǵat ıgilikterin uqypty paıdalaný jáne sanaly tutyný jolyn tańdaǵan azamattarymyzdyń sany artyp keledi. Bul – jarqyn bolashaǵymyzǵa kepil bolatyn ıgi úrdis. Men búkil halqymyzdy tazalyq pen tártip estafetasyna belsene qatysýǵa shaqyramyn. Bárimiz kúsh biriktirsek, elimizdi bıik belesterge jetelep, Ádiletti, Taza, О́rkendegen Qazaqstandy qura alamyz.Barshańyzǵa amandyq jáne baq-bereke tileımin», dedi Prezıdent.