Soltústik Qazaqstan oblysynda belgili kásipker Azamat Batanovtyń ólimine qatysty rezonansty is boıynsha sot úkimi shyqty. Alqabılerdiń qatysýymen ótken sotta basty aıyptalýshyǵa 11 jylǵa bas bostandyǵynan aıyrý týraly sheshim qabyldandy, dep habarlaıdy Egemen.kz.
Qaıǵyly oqıǵa 2025 jyldyń kúzinde Soltústik Qazaqstan oblysy Tımırıazev aýdanyndaǵy Dokýchaevo aýylynda bolǵan. Tergeý dereginshe, 22 jastaǵy jumysshy mas kúıinde «Býrbat» JShS dırektory, 52 jastaǵy Azamat Batanovtyń úıine baryp, ony atyp óltirgen.
Is alqabılerdiń qatysýymen qaraldy. Sot aldynda eki adam jaýap berdi. Onyń biri kásipkerge otqan Vadım Orlov bolsa, ekinshisi asa aýyr qylmysty jasyryp qalǵan Vıktor Torgashov.
Aıyptaý nusqasyna sáıkes, Orlov alkogoldik masań kúıde ańshy myltyǵyn alyp, aýyl ishinde buryn renjisken adamdarmen «esep aıyrysýǵa» shyqqan. Keıin ol buryn jumys istegen sharýashylyq basshysy Batanovtan eńbekaqysyn talap etý úshin onyń úıine barǵan. Kelispeýshilik kezinde Orlov kásipkerdiń keýde tusyna, keıin basyna oq atqan. Alǵan jaraqatynan kásipker kóz jumǵan.
Sotta aıyptalýshy bastapqyda kinásin ishinara moıyndap, keıin ózin-ózi qorǵadym dep málimdedi. Ol sharýashylyqta beıresmı jumys istep, 1,3 mln teńge eńbekaqy almaǵanyn aıtqan. Alaıda marqumnyń qyzy bul málimetti joqqa shyǵardy.
10 aqpanda Soltústik Qazaqstan oblysynyń mamandandyrylǵan aýdanaralyq qylmystyq ister jónindegi soty úkim shyǵardy. Úkimge sáıkes, Vadım Orlov 11 jylǵa ortasha qaýipsizdiktegi túzeý mekemesine, Vıktor Torgashov 2 jylǵa eń tómengi qaýipsizdiktegi mekemege sottaldy.
Sondaı-aq sot Orlovtan marqumnyń jubaıy, eki qyzy men ata-anasynyń árqaısysyna moraldyq shyǵyn retinde 2,5 mıllıon teńgeden óndirip alý týraly sheshim shyǵardy.
Alaıda, jábirlenýshi tarap úkimdi jeńil dep sanaıdy, apellıasııaǵa shaǵym berý máselesi áli qarastyrylyp jatyr.