Qazaqstan Ázerbaıjanǵa qoldaý kórsetip keledi

Qazaqstan basshysy Nursultan Nazarbaevtyń Ázerbaıjanǵa resmı sapary týraly eki eldiń buqa­ra­lyq aqparat quraldary jan-jaq­ty aqparat berdi. Sonyń ishinde Ázer­baıjan AzerTAdj aqparat agent­tigi bul kezdesýler týraly jeti tilde 50-den asa aqparat taratty. Mem­leket basshylary deńgeıindegi kezdesýde Ázerbaıjan Prezıdenti Il­ham Álıev «Qazaqstan álemdegi qýat­ty memleketterdiń birine aınal­dy», dedi.

Qazaqstannyń BUU Qaýip­sizdik Keńesi­niń turaqty emes múshe­ligine kirgenin Ázer­baıjan basshysy joǵary baǵalady. Qazaq­stan Respýblıkasynyń tek óńirlik emes, álem­dik deńgeıdegi másele­ler­di sheshýdegi ara­aǵaıyndyq bastama­larynyń óz jemisin bere bastaǵanyna toqtaldy.  Qazaqstan basshysy eki el arasynda eshbir túıindi másele joq ekenin aıtty. «Qazaqstanda ómir súrip jatqan 130 myń ázerbaıjan etnosy eki el arasyndaǵy saýda qatynastarynyń damýyna úles qosyp jatyr», dedi Nursultan Nazarbaev.  

Al eldiń bas gazeti «Ázerbaıjan» basylymy Qazaqstan Prezıdenti Nursultan Nazarbaevtyń Geıdar Álıev ordenimen marapattalǵanyn habarlady. Jáne bul ordenniń Ázerbaıjanǵa eń jaqyn memleketter basshylaryna ǵana beriletinin jazdy. Marapattaý rásiminde Nursultan Nazarbaev: «1979 jyldan beri Geıdar Álıevpen óte jaqyn baılanys­ta boldyq. Keńes ókimeti kezinde úl­ken saıasatta bolǵan tulǵaǵa degen seni­mim zor edi. Onyń qoldaýyn da sezine­tin­min. Bıyl qos memlekettiń dıploma­tııalyq qatynasynyń 25 jyldyǵyn atap ótip jatyrmyz. Men qazir Geı­dar Álıevpen ózara jasasqan keli­simdi iske asyrý ústindemin, – dedi.  

Ázerbaıjannyń taǵy bir bedeldi basylymy «Mýsavat» gazeti «Nazarbaevtyń Baký saparynyń túpki máni» atty maqala jarııa­lady. «Táýelsizdik alǵannan keıin túrki memleketteri arasynda Ázerbaıjanmen tyǵyz qarym-qatynas ornatqan jalǵyz memleket bolsa, ol – Qazaqstan. Qazirgi tańda qos memleket barlyq saladaǵy qarym-qatynasty joǵary deńgeıge jetkizdi. Buǵan Nursultan Nazarbaev pen marqum Geıdar Álıevtiń arasyndaǵy dostyq, dıplomatııalyq qarym-qatynas negiz boldy. Osy ýaqyt aralyǵynda Qazaqstan ár salada Ázerbaıjanǵa úlken qoldaý kórsetip keledi. Sonyń biri – Nursultan Nazarbaevtyń túrki memleketteri arasynda ortaq naryq qurý týraly bastamasy. Ázerbaıjannyń memlekettik shekarasyn myqtaýyna da Qazaqstan Prezıdentiniń qos­qan úlesi zor. Sonymen qatar, saý­da-ekonomıkalyq salalarda da Nursultan Nazarbaev qos memlekettiń qaty­nasyna basymdyq berip keledi. Bul turǵyda Qazaqstannan alarymyz mol. Ekonomıkalyq qatynastar ýaqyt ótken saıyn jańa deńgeıge kóte­ri­le bermek», dep jazady basylym.

Al Publika.az saıty Nursultan Nazarbaevtyń Baký saparyna erekshe nazar aýdarǵan. Ondaǵy maqalada Ujymdyq Qaýipsizdik Kelisimi men Eýrazııalyq ekonomıkalyq odaqta mańyzdy orynǵa ıe resmı Astananyń qoldaýyn Ázerbaıjannyń erekshe sezinip otyrǵany aıtylady.  Ázerbaıjannyń memlekettik aqparat quraldarynan bólek Sputnik, «Azattyq radıosy», BBC Azeri, «Amerıka daýysy» sekildi sheteldik basylymdar da qos memleket arasyndaǵy baılanysty joǵary baǵalap, Nursultan Nazarbaevtyń resmı saparyna erekshe kóńil aýdardy. Sonyń ishinde Elbasynyń baýyrlas memleketter táýelsizdigin nyǵaıtý jolyndaǵy eńbegi erekshe atalǵan. Jalpy, Qazaqstan Prezıdentiniń túbi bir túrki memleketteriniń birligine ólsheýsiz úles qosyp kele jatqany sóz bolǵan.

Fızýlı MEDJIDLI, arnaıy «Egemen Qazaqstan» úshin