Otyrystyń ashylýynda «Atameken» ulttyq kásipkerler palatasy basqarmasynyń tóraǵasy Abylaı Myrzahmetov sóz sóılep, túrki elderiniń saýda-ekonomıkalyq baılanystaryn jaqsartýdy kózdeıtin jańashyldyqtar, saladaǵy kedergilerdi tómendetýge jáne júkterdi jedel ótkizýge baǵyttalǵan kedendik resimdeýdegi ózgerister jaıynda aıtyp berdi. «Biz sharamyzdy qazaqstandyq-túrkııalyq birlesken saýda-ónerkásip palatasyn qurý týraly memorandýmǵa qol qoıýmen bastadyq. Oǵan áriptesterimizdiń de qosylatyndyǵyna senimdimin. Ázerbaıjan men Qyrǵyzstandaǵy áriptesterimiz qosylsa, biz birlese jumys isteıtin biryńǵaı platforma jasar edik», dedi A.Myrzahmetov.
«Atameken» UKP basqarmasynyń tóraǵasy palatanyń qatysýymen barlyq óńirde kedendik resimdeý aımaǵy qurylatyndyǵyn jetkizdi. «Bul týraly sheshim qabyldandy. Premer-Mınıstr Baqytjan Saǵyntaev oblystarǵa usynys jasaýda. Kedendik resimdeý aımaqtary standartqa saı, bızneske yńǵaıly bolýy úshin «Atamekenge» qaramaq. Biz jeke ınvestorlarmen bul jumysty júzege asyrýymyz qajet. Nátıjesinde palatanyń bedeli men múmkindigi kóterile túsedi», dedi Abylaı Isabekuly. Onyń sózine qaraǵanda, Úkimet basshysy keden arqyly júkterdiń jedel ótýi jumystaryn jeke baqylaýynda ustap otyr. Kedendik kedergilerdi, ásirese, Aqtaýda túbegeıli joıý jónindegi josparǵa qol qoıylǵan. Nátıjesinde, qujattar sany qysqartylyp, veterınarlyq jáne fıtosanıtarlyq baqylaý júzege asyrylatyn boldy. Eń birinshi kezekte Aqtaý men Qorǵastaǵy kedendik ınfraqurylym jaqsartylady.
Basqosýda Túrik Respýblıkasy Saýda palatasy men taýarly bırja odaǵynyń prezıdenti Rıfat Hısardjyklyoglý, Ázerbaıjan Respýblıkasy Kásipkerlerdiń ulttyq konferensııasy prezıdenti Mámed Musaev jáne Qyrǵyz Respýblıkasy Saýda-ónerkásip palatasynyń prezıdenti Marat Sharshekeev sóz sóıledi. Olar keńes jumysyn, bıznestegi yntymaqtastyq, ekonomıkalyq baǵyttardyń damýyn talqylady.
Jıyn barysynda «Atameken» ulttyq kásipkerler palatasy basqarma tóraǵasynyń orynbasary Nurjan Áltaev úlken naryqtarǵa shyǵý úshin túrki elderimen seriktesý mańyzdy ekenin áńgimeledi. «О́zbek, ázerbaıjan, qyrǵyz jáne túrik áriptesterimizben barynsha baıypty túrde seriktesýimiz qajet. Ásirese, bizdiń ázirshe tájirıbemiz joq birqatar ónim túrleri boıynsha jumystardy jandandyrǵan jón. Máselen, biz eshqashan óndirmegen ónim Túrkııada bar. Biz olarmen seriktesip, tájirıbelerin, tehnologııalaryn alýymyz kerek. Túrikter mundaı seriktestikke daıyn», dedi N.Áltaev.
Palata ókiliniń sózinshe, Reseı men Qytaı sııaqty iri elderden túsetin suranysty qanaǵattandyrý úshin Qazaqstan kórshi eldermen birigip jumys atqarǵany abzal. Aıtalyq, Qyrǵyzstan, О́zbekstan, Ázerbaıjan jáne Túrkııa memleketterimen tilimiz uqsas, mádenıetimiz, dinimiz bir. Osy eldermen kooperasııalanyp, jaqyn iri naryqtarǵa jol ashý kerek. «Qytaı men Reseıden azyq-túlikke suranys óte joǵary. Al Qazaqstan ony qanaǵattandyra almaı otyr. Sol sebepten Qazaqstan Túrkııamen birigip, jobalar jasaýda. Sondaı jobalardyń biri – termııalyq óńdelgen taýyq aıaqtary óniminiń óndirisi. Biz munymen Qytaı naryǵyn qamtamasyz etemiz», dedi N.Áltaev. Onyń aıtýynsha, jaqyn arada Túrkitildes memleketterdiń iskerlik keńesine О́zbekstan da kirmek.
Ashat RAIQUL «Egemen Qazaqstan»