«Kóshbasshylyq jeke tulǵaǵa qaratylyp aıtylatyn qasıet bolsa kerek. Bul rette Qazaqstannyń Tuńǵysh Prezıdenti Nursultan Nazarbaevtyń ómiri barshamyzǵa ónege bolady dep oılaımyn. Elbasynyń saıası sheshimderi kóshbasshylyq, kósemdik tulǵasyn kórsetedi. Búgingi bilim jarysynda júzden júırik, myńnan myqty shyǵýlaryńyzǵa tilektespin», dedi Qazaqstan Respýblıkasy Tuńǵysh Prezıdenti – Elbasy kitaphanasy dırektorynyń orynbasary Japsarbaı Ilııasuly.
Qazaqstan jastary kongresi – jastar men jastar uıymdarynyń múddelerin qorǵaý mindetin atqaratyn respýblıkalyq uıym. Búginde kitaphana men Qazaqstan jastary kongresi jastarmen júıeli jumys júrgizý qyzmeti aıasynda túrli jobalardy júzege asyrýda. Osy saıys sonyń bir dáleli ispettes.
«Bul jarys tek oqýshylardyń bilimin synaýmen shektelmeıdi. Olardyń jan-jaqtylyǵyn, tapqyrlyǵyn, sheshendigin tekseredi. Sebebi saıystyń aty aıtyp turǵandaı, kóshbasshy bolý úshin bilimdi bolý jetkiliksiz. Odan bólek uıymdastyrýshylyq, belsendilik qabilettiń de qajet ekeni málim. Qazaqstan jastary kongresi – 2001 jyly tikeleı Elbasynyń tapsyrmasymen qurylǵan elimizdegi eń úlken jastar uıymy. Osy ýaqytqa deıin jastardyń qabiletin arttyrýǵa, patrıottyq sezimin kúsheıtýge óz úlesterin qosyp keledi», dedi «Qazaqstan jastary kongresi» zańdy tulǵalar birlestigi atqarýshy dırektorynyń orynbasary Dáýlet Ǵalymbekuly.
«Kóshbasshy-2017» saıysynda 8-10-synyp oqýshylarynyń jalpy pánder boıynsha bilimi, kóshbasshylyq qabiletteri synaldy. Saıys 4 kezeńnen turdy. Olar – oıyn trenıngteri, ıntellektýaldy saıys, jurt aldynda sóz sóıleý – public speech jáne suhbat. Saıys qatysýshylarymen suhbattasý oqýshynyń ómirlik qaǵıdasy, oqyǵan kitaptary, izdenisteri, jáne synı oılaý qabiletin aıqyndaý maqsatynda ótkizildi.
Saıys nátıjesi boıynsha №70 lıseı mektebiniń oqýshysy Aıjan Tólebaı jeńimpaz atandy.
Raýan QAIDAR, «Egemen Qazaqstan»