Sh.Aımanov atyndaǵy «Qazaqfılm» AQ jaryqqa shyǵarǵan «Qunanbaı» jáne «Jańǵaq tal» fılmderi Qytaıdyń astanasynda osy jyly 19-21 sáýir aralyǵynda ótetin Halyqaralyq Beıjiń kınofestıvaliniń (Beijing International Film Festival) «Panorama» baǵdarlamasynda kórsetiletin bolady.
«Fılm kóptegen festıvalderge qatysyp, tanylyp jatqanyna óte qýanyshtymyn. Kartınanyń jelisi meıirimge toly, sondyqtan da qytaılyq kórermenderdiń kóńilinen shyǵatynyna senimdimin», - dedi «Jańǵaq tal» fılminiń rejısseri Erlan Nurmaǵambetov.
Esterińizge sala ketsek, «Jańǵaq tal» fılmi Ońtústik Koreıadaǵy Pýsan festıvalinde álemdik premerasyn ótkizip, onda New Currents («Jańa aǵym») seksııasy aıasynda bas júldeni ıemdengen bolatyn. Sonymen qatar, atalmysh kartına Vezýldegi Azııa kınolary 22-i Halyqaralyq kınofestıvaliniń negizgi baıqaýynda kórsetilip (Fransııa, 2016 j.), eki birdeı júldege – halyqaralyq qazylardyń arnaýly júldesine jáne kıno synshylarynyń arnaýly júldesine ıe boldy.
«Osydan birneshe jyl buryn marqum Talasbek Ásemqulov ekeýimiz «Birjan sal» fılmimen Qytaıǵa arnaıy baryp edik. Kórsetilimge 500-ge jýyq halyq qatysty, olardyń arasynda qazaqtar da boldy. Fılmdi óte keremet qabyldady. Tarıhtan syr shertetin fılmimiz qytaılyq kórermenderge unaıdy degen oıdamyn», - dedi «Qunanbaı» fılminiń rejısseri Doshan Joljaqsynov.
Uly oıshyl Abaıdyń ákesi – Qunanbaı О́skenbaıulynyń ómiri jaıly baıandaıtyn tarıhı týyndy elimiz boıynsha prokatqa 2015 jyly shyǵyp, kórermenniń kózaıymyna aınalǵan bolatyn. Atalmysh fılm QR Prezıdenti N.Á.Nazarbaevtyń jáne Memleket tarapynan da joǵary baǵasyn aldy. Elbasy QR Táýelsizdik kúnin toılaý qarsańynda 2016 jyldyń ádebıet pen óner salasy boıynsha Memlekettik syılyqty fılmniń túsirý tobyna úlestirdi. Jarlyqqa sáıkes premııa rejısser – Doshan Joljaqsynovqa, qoıýshy sýretshi – Rýstam Odınaevqa, sonymen qatar akterler – Nýrsıfat Salyqovaǵa jáne Aıdos Bektemirge berildi.
Sonymen qatar, alǵashqy ulttyq «Tulpar» kınopremııasynda fılmniń avtorlary úzdik atanyp, «Úzdik er adam róli», «Úzdik qoıýshy sýretshi», «Úzdik kompozıtor», «Úzdik ssenarıı» atalymdar boıynsha tórt birdeı júldege qol jetkizdi. Odan bólek, Ýfada ótken III halyqaralyq ulttyq jáne etnıkalyq kıno «Kúmis Aqbozat» festıvalinde Ámir Ábdirazaqov atyndaǵy «Ulttyq rýh» júldesin ıelengen.
Beıjiń halyqaralyq kınofestıvali Qytaıdyń baılanys, radıo, kınematografııa jáne telearnalar bas basqarmasy jáne Beıjińniń mýnısıpalıtet halyq úkimeti, sondaı-aq Qytaıdyń kıno jónindegi basqarmasynyń uıymdastyrýymen ótkiziledi. Baıqaý uıymdastyrýshylarynyń aıtýyna qaraǵanda, Beıjiń festıvali jyldan jylǵa damyp, búginde Azııada ótip jatqan kınofestıvalderdiń aldynda tur.
Bıyl baıqaýǵa 90 elden 1000-ǵa jýyq kınotýyndylar qatysyp otyr. Olardyń ishinen negizgi baǵdarlamaǵa 15 fılm iriktelip alynǵan. Konkýrstyq baıqaýǵa usynylǵan fılmderdiń úzdigin belgili dat rejısseri Bıll Avgýsttyń basshylyǵymen halyqaralyq qazylar alqasy anyqtaıtyn bolady.