Ushaq jolaýshylarynyń satyp alǵan bıletterin keri qaıtarýy qalypty qubylys. Mundaı jaǵdaıda kóbinese áýe kompanııalary bılettiń aqshasyn tolyqtaı nemese bir bóligin qaıtaryp beredi. Al ushaqtaǵy orynnyń bos ketýi olarǵa tıimsiz. Sol sebepti áýe kompanııalary «overbýkıng» saıasatyn qoldanady. Bul – bıletterdiń reıste bar oryndardan kóp satylýy, ıaǵnı bıletterdi artyǵymen satý. Osy arqyly áýe tasymaldaýshylar qaıtarylǵan bılet shyǵynynyń ornyn toltyryp otyrady.
Shuǵyl túrde tórt qyzmetkerin reıske otyrǵyzýy kerek bolǵan United Airlines áýe kompanııasy ushaq bortynan bos oryn tappady. Bul joly keri qaıtarylǵan bılet bolmaǵandyqtan, kompanııaǵa reısten tórt adamdy túsirip tastaý qajet boldy. Olar erik bildirgen tórt jolaýshyǵa kelesi reıspen ushýǵa usynys bildirip, ótemaqy retinde 400 dollar tóleıtinderin jáne bir túnge qonaq úıden oryn beretinderin aıtqan. Alaıda, eshbir jolaýshy usynysqa kelispegendikten, ótemaqy somasyn 800 dollarǵa kótergen. Sonda da eshkim reısten túsýge qulyq tanytpapty.
Budan soń áýe kompanııa menedjeri bortqa kóterilip, ushaqtan túsýi tıis tórt adamdy tańdaýǵa týra keletinin habarlady. Bul irikteý túrli faktorlardy eskere otyryp jasalady. Alaıda, kompanııanyń baspasóz hatshysy málimdegendeı, kompanııa qyzmetin únemi paıdalanatyn jolaýshylardyń, sondaı-aq qymbat bılet ıeleriniń irikteýge qatyspaý múmkindigi joǵary.
Qyzmetkerler tańdaǵan úsh jolaýshy óz erikterimen ushaqtan túsýge kelisken. Al tańdalǵan taǵy bir adam óziniń dáriger ekenin, tańerteń qabyldaıtyn naýqastary bar ekenin aıtyp, borttan túsýden bas tartady. Nátıjesinde kompanııa menedjeri qaýipsizdik qyzmetkerlerin shaqyryp, jolaýshyny ushaqtan kúshtep túsirdi.
Vıdeoda qaýipsizdik qyzmetkerleriniń ony ushaq bortynan súırep shyǵarǵany kórsetilgen.
«Áýe kompanııanyń qyzmetkerlerdi tasymaldaý úshin jolaýshylardy reısten túsirýi – erekshe jaǵdaı. Qyzmetkerlerdi tasymaldaý aldyn ala josparlanyp, brondaý júıesine engizilýi tıis, – dep málimdedi Travelers United jolaýshylar quqyǵyn qorǵaý jónindegi uıymnyń negizin qalaýshy Charlz Lıcha. – AQSh-ta jolaýshylar reıs ýaqytynyń únemi keshigýine, qyzmet kórsetý deńgeıiniń tómendigine úırenip qalǵan. Alaıda, óz qyzmetkerine oryn bosatyp berýi úshin jolaýshyny ushaqtan kúshtep shyǵarýy artyqtyq. Buǵan tózýge bolmaıdy».
United Airlines áýe kompanııasynyń basshysy Oskar Mýnos bolǵan oqıǵaǵa baılanysty keshirim surady.
«Bul biz úshin ókinishti jaǵdaı. Jolaýshylardy keıingi reıske aýystyrǵanymyz úshin keshirim suraımyn», – degen ol qazirgi ýaqytta oqıǵaǵa baılanysty tergeý júrgizilip jatqanyn jetkizdi.
Vıdeodaǵa qaraǵanda, ushaqtan kúshtep shyǵarylǵan adamnyń ulty qytaıǵa keledi. Qytaılyq WeChat-tyń paıdalanýshylary oqıǵaǵa baılanysty tıisti sharalar qabyldanbaǵansha United Airlines kompanııasyna baıkot jarııalaýǵa shaqyrdy.
«Kompanııa bul úshin tıisti jazasyn alýy kerek. Reısten túsirilgen azamattyń qytaılyq bolǵany úshin emes. Mundaı negizsiz árekettermen kúresýge ár adamnyń quqy bolýy tıis», – dep jazdy chat qoldanýshylarynyń biri.
Baıkotqa shaqyrý týraly habarlamany Qytaıdyń tanymal Weibo áleýmettik jelisiniń 480 mıllıonnan astam paıdalanýshysy qarady.
Oqıǵadan keıin kompanııanyń kapıtaly 1 mlrd dollarǵa azaıdy. Áleýmettik jeliler men aqparat quraldarynda taraǵan narazylyq tolqynynan keıin, United Airlines áýe kompanııasynyń aksııalary bırjada 4,4%-ǵa tómendedi. United Continental holdınginiń naryqtyq baǵasy 250 mln dollarǵa qulady.
Atalǵan oqıǵaǵa baılanysty Qytaı memlekettik BAQ ókilderi de pikir bildirdi.
«Kompanııa oqıǵadan keıingi málimdemelerinde azııalyq azamatqa zorlyq kórsetilgenin atap ótpegenderi qatty qynjyltady», dep jazdy Qytaı Kommýnıstik partııasynyń resmı basylymy «Jenmın jıbao».
Jolaýshymen bolǵan oqıǵa kompanııanyń halyqaralyq bedeline budan da eleýli nuqsan keltirýi múmkin. Sebebi United Airlines – AQSh pen Qytaı arasynda eń kóp áýe tasymalyn júrgizetin kompanııa.