Elbasy óz maqalasynda «HH ǵasyrdaǵy batystyq jańǵyrý úlgisiniń búgingi zamannyń bolmysyna saı kelmeýiniń syry nede? Menińshe, basty kemshiligi – olardyń ózderine ǵana tán qalyby men tájirıbesin basqa halyqtar men órkenıetterdiń erekshelikterin eskermeı, bárine jappaı eriksiz tańýynda», – deıdi. Kóneni qııa almaı, jańany jııa almaı júrgen talaılar úshin asa batyl baılam. Kópten kútkenimiz de osy sóz! О́ıtkeni, oı ozat ta azat bolmaı tolyq erkindik joq.
О́zgeniń tasy órge domalaǵandaı kórip kelgenimiz ras. Bálkim soǵys kórmegen, otqa kúımegen keıbir órkenıetti elderde damý qarqyny joǵary shyǵar. Sol sebepti ózge damýshy memleketterge ústem kózqarasta da bolar. Aq sóıleý paryz, dese de olarda rýhanııattyń róli tym tómen. Moral men adamgershilik ahýal jyl ótken saıyn quldyraý ústinde. Aqsha materıaldyq ıgilik. Al, materıaldyq ıgilik eshqashan kýltke aınalmaýy kerek. Rýhanı ıgilikti kýlt dárejesine kótergen eldiń ǵana mereıi ústem, baǵy zor.
Nursultan Nazarbaev osynyń bárin aqyl tarazysyna salyp, elimizdiń úshinshi ıaǵnı rýhanı jańǵyrýy men bilimdi ult, boıaý-bolmysyn joǵaltpaǵan jurt atanýynyń sara jolyn kórsetip berdi. Jahandanýdyń kúmándi tustary basym. Oǵan erip óńir tıegimizdi aǵyta qoısaq salt, dástúr, ulttyq naqysh syndy qymbat qazynamyzdyń boıaýyn solǵyn tarttyryp alamyz. Qaı ǵasyrdyń belesine shyqsaq ta ımany men jıǵany buıyrǵan, ıba-ádebi úzilmegen, aýzynda dýa, saqalyna kıe daryǵan qazaq bolyp qalǵanǵa ne jetsin! О́ıtkeni, biz ózgege tabynyp ta, tańyrqap ta bolǵan táýelsiz elmiz! Elbasy bizge osyny meńzep otyr. Nurly bolashaqqa alyp shyqpasam maǵan sert, ere almasań saǵan sert dep otyr!
Sonymen birge, maqalada aıtylǵandaı, «Týǵan jer» baǵdarlamasy jalpyulttyq patrıotızmniń naǵyz ózegine aınalady. Týǵan jerge degen súıispenshilik Týǵan elge – Qazaqstanǵa degen patrıottyq sezimge ulasady», – degen joldar eldi erekshe jigerlendirdi. Túrli kúmán-qaýipti seıiltti.
Iá, qazaq qashanda týǵan jerge kindiginen baılanyp qalǵan. Álemniń qaı túkpirine ókshemiz tıse de, atakúldikti ańsap oralatynymyz sondyqtan. Baıaǵy babalarymyz alys sapar shekkende, beline týǵan jerdiń bir ýys topyraǵyn túıe ketetini sol qasıetinen shyǵar? О́ıtkeni, oǵan nebir arystarymyzdyń teri men qany, armany men muńy, qýanyshy sińgen. Týǵan jer týyp, ósip-órkendeseń de kerek, ólseń de kerek. Ásirese, qazaq úshin!
Adamnyń kóılegi tozar, kóńili tozbaýy abzal. Ol úshin Prezıdent aıtqandaı, tarıhı jadyny oıatyp, týǵan eldegi kıeli ǵımarattar men qasıetti qorym, qonystarǵa basa nazar aýdarý lázim. Bul keshegi qyrsyq qashyp, qydyr aınaldyrǵan eldiń enshisindegi is. Rasynda da, ol úshin Ǵylym akademııasy men Jazýshylar odaǵynyń rólin barynsha arttyrǵan jón. Sońǵy jyldary etek alyp ketken qoldan batyr, bı jasaý, joq jerden áýlıe, ámbıe tabý, kúmándi jerge tabyný syndy keleńsiz kórinisterge toqtam bolar edi. Asyl men jasyqty aıyra biletin halqymyzdyń sahı da sarabdal kóńilinen aınalaıyn!
Bul – rýh jyry!
Bul – rýhanı jańǵyrý men jańasha túleý týraly tolǵaý.
Rahymjan OTARBAEV,
jazýshy-dramatýrg, Atyraý qalasynyń qurmetti azamaty