Motosıkldi ómiriniń máni dep biletin 100 shaqty baıker kezekti maýsymnyń ashylýyn «EKSPO-2017» halyqaralyq kórmesine arnady. Shymkent qalasynyń kóshelerin aralap, «EKSPO-2017» kórmesin nasıhattaǵan avtoshabandozdar ózderine tán erejeler men qaǵıdalardy jurt nazaryna usyndy. Sondaı-aq Shymkent qalasyndaǵy №3 jetim balalar úıine arnaıy baryp, qaıyrymdylyq sharasyna atsalysty.
Ońtústik Qazastan baıkerler federasııasynyń prezıdenti Rústem Bazarbekovtiń aıtýynsha, 29 mamyr kúni ońtústikqazaqstandyq 10 baıker EKSPO-2017 kórmesiniń qurmetine respýblıkalyq motosherý uıymdastyrmaq. Shymkent qalasynan bastaý alatyn motosherýdiń maqsaty – EKSPO kórmesin respýblıka jurtyna keńinen nasıhattaý.
«Motosherý 29 – mamyrda Shymkentten bastaý alady. Bizdiń bul ıdeıamyzǵa Ońtústik Qazaqstan oblysynyń ákimdigi qoldaý bildirip otyr. Eń aldymen biz rýhanı astanamyz-Túrkistan qalasyna sosyn Qyzylorda, Aqtóbe, Qostanaı, Petropavl, Kókshetaý qalalary arqyly elorda da ótip jatqan «EKSPO-2017» halyqaralyq kórmesiniń ashylý saltanatyna kirip barǵaly otyrmyz», - deıdi Ońtústik Qazastan oblystyq motosıklıster federasııasynyń prezıdenti Rústem Bazarbekov.
Esterińizge sala keteıik, búginde Ońtústik Qazaqstan oblysynda motosportqa qyzyǵýshylyq tanytyp, baıker atanǵandardyń sany 300-ge jýyqtaıdy. Olar jyl saıyn oblysymyzdaǵy qoǵamdyq is-sharalarǵa belsene qatysyp, jastardy sportqa baýlýǵa, salaýatty ómir saltyn ustanýǵa atsalysyp keledi.