Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev negizgi baıandama jasady. Atqarylǵan ister jaıynda aıta kelip, ol normatıvtik-quqyqtyq aktilerdiń jobalaryn mindetti túrde sybaılas jemqorlyqqa qarsy saraptama jasaý jáne aıqyndalǵan sybaılas jemqorlyq qaýipteri jónindegi usynystardy mindetti túrde oryndaý ınstıtýtyn qalpyna keltirýdi usyndy. Odan basqa, agenttik etıkalyq turǵydaǵy tártipsizdikterdiń jekelegen quramyn memlekettik qyzmettiń bedelin túsirý áreketteriniń qataryna jatqyzýdy usynyp otyr.
Darıǵa Nazarbaeva sybaılas jemqorlyqpen kúres «elestermen kúreske» aınalyp ketpeýine nazar aýdardy. «Adamdy jazalaý úshin sheshim qabyldaýda ádepsizdikti qalaı ólsheýge bolady? Onda adam taǵdyry, onyń otbasynyń taǵdyry sheshiledi. Bul jerde óte muqııat bolý kerek», − dedi ol. Senator, sonymen, birge sybaılas jemqorlyq jóninde tártip buzýshylyqtar týraly habarlaǵan azamattarǵa jan-jaqty qoldaý kórsetýdi usyndy. «Olardy qorǵaýdy jáne laıyqty marapattaýdy qamtamasyz etý qajet», dep sanaıdy senator.
Senatorlar Nurtaı Ábiqaev, Serik Jaqsybekov, Lıazzat Qıynov, Rashıt Ahmetov, Serik Aqylbaı, Sársenbaı Eńsegenov óz usynystary men eskertpelerin aıtty. Depýtattar Parlament janynan ǵylymı-zertteý ınstıtýtyn qurýdy, memlekettik qyzmetshilerdi tańdaý barysyna jan-jaqty nazar aýdarýdy, memlekettik qyzmetshilerge laıyqty eńbekaqy tóleý múmkindigin qarastyrýdy, qoǵamdyq keńester jumystaryn jetildirýdi usyndy.
Dóńgelek ústel sońynda D.Nazarbaeva: «Bes ınstıtýttyq reformany iske asyrý jónindegi «100 naqty qadam» Ult josparynda barlyq mańyzdy máseleler qarastyrylǵan bolatyn. Parlament qajet zańdardy qabyldady, biraq olar jumys istemeı otyr, óıtkeni, bıýrokratııa oǵan nazar aýdarmady», − dedi.