Bizdiń elimizdiń Gaaga konferensııasyna múshe bolýy Qazaqstan quqyq júıesiniń álemdik standarttardy eskere otyryp, odan ári damýyna, qazaqstandyq azamattardyń shet elderdegi múddeleri men quqyqtarynyń qorǵalý tıimdiligin arttyrýǵa yqpal etedi. Gaaga konferensııasynyń quramyna ený Qazaqstanǵa ortaq ister men saıasat jónindegi keńeske qatysýǵa, konvensııa jobalaryn ázirleý úshin arnaıy komıssııalar jumysyna qatysýǵa nemese Gaaga konferensııasy jumysynyń aıasynda halyqaralyq jeke quqyqtyń barlyq máselelerin zerdeleýge, Gaaga konvensııasyna úılestirýdi taldaý barysynda Gaaga konferensııasy men onyń músheleriniń saraptamalyq kómegin alýǵa, nemese ózge Gaaga konvensııalaryna qosylýdyń tıimdiligi máselelerin qarastyrýǵa múmkindik beredi.
Senatorlar Georgıı Kım men Rashıt Ákimovtiń saýalyna Ádilet mınıstri Marat Beketaev jaýap berdi. Senator Marat Taǵymov zańdy qoldaý turǵysynda sóz sóıledi.
Zańnamaǵa dene shynyqtyrý men sport máseleleri boıynsha túzetýler eki oqylymda qaralyp, qabyldandy. Qujat dene shynyqtyrý jáne sport salasyn qarjylandyrýdyń qoldanystaǵy júıesin jetildirý, aıqyndyǵy men qarjylandyrý júıesiniń shynaıylyǵyn arttyrý maqsatynda ázirlengen bolatyn. Túzetýlermen elimizdiń Bıýdjet kodeksine, «Salyq jáne bıýdjetke tólenetin basqa da mindetti tólemder týraly» kodekske, sondaı-aq, «Dene shynyqtyrý jáne sport týraly» Zańǵa ózgerister men tolyqtyrýlar engiziledi. Bıýdjet kodeksine túzetý Qazaqstan Respýblıkasynyń Ulttyq olımpıada komıtetine 2018 jylǵy 1 qańtardan bastap dene shynyqtyrý jáne sport salasyndaǵy memlekettik tapsyrmany alýǵa jáne oǵan qatysýǵa quqyq berýdi kózdeıdi. «Dene shynyqtyrý jáne sport týraly» Zańda sport túrleri boıynsha bıýdjet qarajatynyń tıimdi bólinýin qamtamasyz etý maqsatynda sport túrlerin saralaý júıesin engizý, Ulttyq olımpıada komıtetin qosa alǵanda, memlekettik basqarý organdary men qoǵamdyq birlestikter arasyndaǵy fýnksııalardyń arajigin ajyratý, t.b. usynylady.
Qosymsha baıandama jasaǵan senator Serik Bekturǵanov qujatty qabyldaý nátıjesinde respýblıkalyq jáne aımaqtyq deńgeıdegi qarjy resýrstaryn obektıvti jáne táýelsiz bólýge kepildik beretin úlgi qalyptasatyny kútilip otyrǵanyn jetkizdi. Atap aıtqanda, zań jobasynda kózdelgendeı, sport túrlerine saralaý júıesin engizý jáne basymdyqtar tizimin belgileý óńirler basshylarynyń áýestikteri men unatýshylyqtaryna qaramastan elimizde de, aımaqtarda da keleshegi zor baǵyttardy damytýǵa múmkindik beredi.
Senattyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva zań jobasyn ázirleýshilerge komıtettiń birqatar usynystaryn aıtty. Olar: Qazaqstan Respýblıkasynyń Tuńǵysh Prezıdenti – prezıdenttik test kórsetkishterin kúrdeliligine baılanysty birneshe sanatqa bólý; Mádenıet jáne sport mınıstrligi «Samuryq-Qazyna» ál-aýqat qory» aksıonerlik qoǵamymen birge biryńǵaı operator («Týrızm jáne sport ındýstrııasyn damytý qory») arqyly buryn bólingen qarjy kólemin saqtaı otyryp, kásibı jáne buqaralyq sportty damytýǵa qarjy bólý; Mádenıet jáne sport mınıstrligi Qarjy mınıstrligimen birlese otyryp, kásibı arnaýly jáne buqaralyq sportty qarjylandyrý jónindegi bıýdjet baǵdarlamasyn bólý máselesin pysyqtaý, sondaı-aq kásibı sport klýbtaryna, balalar men jasóspirimderdiń sport mektepterine jáne sport ǵımarattaryna salyq jeńildikterin berý (TSK, jer men múlik salyǵy, QQS); myna sanattardy: kásibı sport, arnaýly jáne buqaralyq sportty paıyzdyq qatynastarǵa baılanysty memleket bıýdjetinen qarjylandyrý kólemin belgileý, aımaqtarda sportty damytý men sport ınfraqurylymyn damytý, salamatty ómir saltyn nasıhattaý, sport jarystaryn qoldaýdy jergilikti atqarýshy organdardyń jaýapkershiligine berý. Mine, osy jáne taǵy basqa mańyzdy máselelerdi zań júzinde bekitý kózdelip otyr.
Otyrys barysynda senatorlardyń depýtattyq saýaldary jarııa etildi.
Nurlybek DOSYBAI,
«Egemen Qazaqstan»