Aýqatty aýyldar kóbeıdi

Aýyl jaǵdaıy jaıly ádette syrttan ton pishilip aıtylyp jatatyn áńgimeniń san-saqtyǵy belgili. Sondaıda múldem músh­kildendiretin topshylaýlar da qu­laqqa az shalynbaıdy. Kórip júrgender bolsa bir sári, árıne,  al kórmese de túımedeıdi túıedeı etýshilerge ne deı alarsyz. Solar óńirdegi Izendi, Eskene,  Marjan­kól, Búrkitti tárizdili sándi ári áldi aýyldardyń ondap emes júzdep sanalatyndyǵyn  biler me eken dep oılaısyz.  Olaı bolmasa mynadaı derek. Byltyr sharýa­shylyǵy órkendeý, turmysy jaq­sarý  ústindegiler 114- ke jetse, bıyl buǵan taǵy 6-ýy qosylǵaly tur. El ishindegi eleýli ózgerister selolyq jerlerdi damytýǵa ar­nalǵan memlekettik baǵdarlama­nyń iske asyrylýy barysynda óristeı túsip keledi. Ýaqyt ta­labyna jarasty bul qubylys oblystyń ásirese, Buqar jyraý, Osakarov, Abaı jáne Nura aý­dandarynda  aıqyn ańǵarylady. Uly baba topyraǵyndaǵy 35 aýyl gúldenýdiń qaı jaǵynan da birinen biri asyp túsýge aınalǵan.  Qalǵan  úsh aýdanda jalpy alǵan­da 80-nen astamynyń isi súı­sinerlik, kórki kóz tartarlyq. Alǵash kórgenniń aýzyn ashtyra­tyn Izendideı aýyldar kóbeıýi qazir tańsyq emes. Mádenıet  úıi­niń, mekteptiń, meshittiń, baıla­nys bólimshesiniń, toıhananyń, qymyzhananyń, sport kesheniniń,  búldirshinder oıyn-saýyǵy alań­qaıynyń, ınternattyń jarqy­raǵan beınesi aınaladaǵy muntaz­daı tazalyqpen astasyp tamsan­dyrady.  Bosa-bolmasyn  turǵyn­da­rynyń aýqatty turmysy jáne jan-jaqqa aıan. Dál irgesindegi Sherbakov ta kelbetimen  bólek. Osydan  tarıhı otandaryna qo­nys aýdaryp ketkender ósken jerlerinde aýnap-qýnap qaıtýǵa kelip turatyn  kezderinde de qazaq aýyly úshin ertegideı beıneniń enýine tańdanyp jatady. Jaqynda eldi mekender ınjenerlik ınfraqurylymyn  jetildirý jáne áleýmettik nysandaryn jańartý boıynsha aldaǵy úsh jyl­ǵa baǵyttalǵan keshendi is-sharalar qabyldanýy ıgilik  ny­shandardyń  odan saıyn  ulǵaıýy­na septik etpek. Osy maqsatqa respýblıkalyq, jergilikti bıýd­jetten 18,1 mıllıard teńge bó­linýi aýyldaǵylarǵa qýanyshty habar bolyp otyr. Aıta ketý kerek, bul bastapqyda jobalanǵan qarajattan 5,1 mıllıard teńgege artyq. Aımaq qýatynyń  nyǵaıýy­na oraı qoldaý kólemi osyn­sha­lyqty molyqty. Mine, búginde jer aıaǵy keńi­simen aýyl jaqtaǵy tynys-tir­shilik serpilip jatyr. Jańadan salynatyn, keńeıtiletin 6 mektep qurylysy bastalyp ketti, den­saýlyq saqtaýdyń 36 nysany kúrdeli jóndeýden ótkizilýde, 14 monsha men 5 naýbaıhana,  aýyz sýmen qamtamasyz etetin  20 nysan salynady. Jurt  kóńiline jaqqan jaǵym­dy jaıdyń biri – turǵyndar sany 100-den aspaıtyn shaǵyn aýyldar da qamqorlyqtan syrtqary qal­maıdy. Olardy ortalyqtandy­rylǵan jaryqpen  jáne sýmen jab­dyqtaýǵa múmkindik shekteýliligine baılanysty sý kózin uńǵy­ma, elektr qýatyn jel dıirmenderi arqyly alý joldary qaras­tyrylǵan. Máselen, Ulytaý aýda­nynyń alystaǵy Qyzylúı, Tal­dyqudyq, Bozdaı, Úńgirli, Qul­janbaı, Narólgen aýyldary úshin atalǵan tásil paıdalanylady. Jergilikti eńbekkerlerdi ká­sip­kerlik iske yntaldandyrýǵa  yqpal úlken. Bul  rette   «AgroKonsaltıng» AQ  kómegine súıe­nýshiler kóbeıýde. Aıtalyq,  jańa­arqalyqtarǵa  lızıngke aǵash óńdeıtin stanok, 4 modýldi monsha, 2 shaǵyn naýbaıhana berildi. Naqty bıznes-josparmen belsene árekettenýge  umtylýshylarǵa kó­mek kórsetilýge jol ashyq. Sózimizdiń bastapqy tusynda tuspaldaǵanymyzdaı, aýyl jaı-kúıi týraly dúdámal joramaldar endi búgingi kúnge jaraspaı­tyndyǵyna aımaqtaǵy aýyldar ajary aıǵaq. О́sken  óńir ómirin elemeý múmkin emes. Aıqyn NESIPBAI.