Elbasynyń álemdik deńgeıdegi bedeli, syrtqy saıasatty júrgizýdegi danagóı sheshimderi, halyqtyń turmys-tirshiligi men mádenıetine degen qamqorlyǵy men el ekonomıkasyn damytý jolyndaǵy batyl qadamdary keshegi ótken saılaýda el qalaýyn anyqtap berdi. N.Nazarbaevty Kóshbasshy dep tanyǵan el urpaqtyń bolashaǵyn sol kisige senip tapsyryp otyr. Prezıdent júrgizip otyrǵan syndarly saıasattyń arqasynda ashyq aspanymyzdyń astynda kók týymyz jelbirep, kórshiles eldermen tatýlyq qarym-qatynas, iskerlik yntymaqtastyq ornap, dúnıe júzi aldynda Qazaqstannyń abyroı-ataǵy asqaqtap keledi.
Táýelsizdik alǵaly 20 jyldyń júzi boldy, jetken jetistikterimiz kóńil qýantady. Keńes ókimeti ydyraǵan alǵashqy jyldary sol Odaqtyń quramynda bolǵan respýblıkalardyń barlyǵy derlik taram-taram joldan tańdaý tappaı, abdyrap qalǵany belgili. Bul Qazaqstandy da aınalyp ótken joq. Ekonomıkada daǵdarys etek alyp, odan qurylys óndirisi salasy da zardap shekti. Baı tehnıkalyq múmkindikterine jáne bilikti mamandar ujymynyń bolýyna qaramastan, kóptegen kásiporyndar, ǵylymı-zertteý, jobalaý uıymdary jańa naryq talaptaryna tótep bere almady. Jobalaý isinde turlaýly tapsyrystar bolmaı, qurylys ındýstrııasy quldyrady. Biraq Elbasynyń kóregen saıasatynyń arqasynda bul qıynshylyqtar qazir artta qaldy.
Sary dalanyń tósindegi Aqmola qalasyn elimizdiń astanasy etip jarııalaý sol kezde kóptiń basyn shaıqatqany ras. Qysy-jazy jel josyǵan budyry joq jazyqta bútin bir eldiń kelbeti bolatyn qala turǵyzý kópshilik úshin aqylǵa syımaıtyn kereǵar oı bolatyn. Alaıda aqyl jetpes aıla joq, batyldyq almas qamal joq. Memleket basshysynyń batyl qadamynyń nátıjesine qazaqstandyqtar ǵana emes, búkil dúnıe júzi tánti bolyp otyr.
1998 jyly Astana qalasynyń bas josparynyń jobasyna jarııalanǵan halyqaralyq konkýrsqa tóraǵalyq etý qurmetine ıe boldym. Bul konkýrs álemniń belgili sáýletshileriniń qyzyǵýshylyǵyn týǵyzdy, baıqaýǵa 20-dan asa eldiń sáýletshileri elýdeı joba usyndy. Konkýrstyń sharty boıynsha jobalardyń ishinen eń úzdik úsheýin tańdap alyp, el Prezıdentiniń tańdaýyna usyný kerek boldy. Elbasynyń tańdaýy kóptiń tańdaýymen úndes shyqty – Astana qalasynyń ortalyǵyn jobalaý mártebesi japondyq sáýletshi, álemge aty áıgili Kıse Kýrakavaǵa tıdi.
Qalanyń qazirgi kelbetine qarap, bul tańdaýdyń sátti bolǵanyna taǵy da kóz jetkizemiz. Kósem kóregendigine tolaǵaı táýekelin serik etip, el astanasyn kóshirgende, halyq sanasyna uıalaǵan kúmándi kóp uzamaı-aq maqtanysh sezimi almastyrdy. Prezıdenttiń ózi «Astana» dep asqaqtatyp at berdi. Sol Astana búginde tyń oılar men uly bastamalardyń, shalqar shabyt pen zııaly zerdeniń toǵysar ordasyna aınaldy. Bul orda Memleket basshysynyń osy qalaǵa arnaǵan eńbeginiń, kúsh-jigeriniń arqasynda qazaq tarıhynda ǵana emes, álem tarıhynda eńsesi bıik, kelbeti kórikti astanalardyń biri bolyp qalady. Sol úshin keler urpaqtyń da alǵys aıtary haq!
Qazaqstan Respýblıkasynda sáýlet, qala qurylysy jáne qurylys qyzmetin damytý sharalarynyń baǵdarlamalary jasalyp, elimizdiń qurylys ındýstrııasynyń áleýetin arttyrý isi alǵa qoıyldy. Bul salada qurylǵanyna kóp bolmasa da, qarymdy jumystardy josparlap otyrǵan Qazaqstan jobalaýshylar qaýymdastyǵy Elbasynyń sáýlet jáne qurylys salasy boıynsha júrgizip otyrǵan saıasatyn qoldaıtyndyǵyn bildiredi jáne el basqarý isinde qajymas qaırat, myqty densaýlyq tileıdi.
Ábdisaǵıt TÁTIǴULOV, Qazaqstan jobalaýshylar qaýymdastyǵynyń prezıdenti, QR Ulttyq ınjenerlik akademııasynyń akademıgi, Memlekettik syılyqtyń laýreaty.