Nursultan Ábishuly Nazarbaevpen zaýyt sehynda alǵash kezdesken sol bir tarıhı kúni men Kentaý qalasyndaǵy transformator zaýytynda stýdenttik-óndiristik tájirıbeden ótip júrgen edim. Bul Elbasynyń 2005 jyly ótken prezıdenttik saılaýdyń saılaýaldy naýqany barysyndaǵy sapary bolatyn. Árıne, bul kezdesýde keýdemde qýanysh, jalpy jańa belesterge órleý sezimi qylań berdi. Zaýyt jumysshylaryna jáne bizge, jas ınjenerlerge arnap sóılegen sózindegi: «Otanshyl bolý – demek, Qazaqstandy árdaıym júregińe jaqyn tutý», degen tujyrymy erekshe esimde qaldy.
Tula boıymdy tebirentken sol sátten beri ómirimde kóptegen ózgerister boldy. Joǵary oqýymdy bitirip, ınjener-energetık boldym. Otbasyly boldym, ulym dúnıege keldi. Joǵary oqý ornynda oqyp júrgen kezde oılastyryp, daıyndaǵan transformator shyǵaratyn zamanaýı zaýyt salý jónindegi jobam, armanym desem de bolar, ol da júzege asty. Onyń irgetasy qysqa merzim ishinde qalanyp, mine, búgin onyń konveıerinen qazaqstandyq joǵary qýatty transformatorlar jiberilýde.
Al 3 sáýirde ótken saılaýǵa kelsem, Nursultan Ábishuly senimdi jeńiske jetti. Biz memleketimizdiń erekshelikterine laıyqty saıası baǵytty tańdaǵan, senim men qurmet bildirgen saılaýshylar qatarynda bolǵanymyzdy maqtan tutamyz. Saılaý ýchaskelerine jastardyń aǵylyp kelip jatqanyna ózimiz de kýáger boldyq. Biz Elbasymen elimizdiń turaqtylyǵyn, ómir súrý deńgeıiniń jaqsarýyn, elimizdiń áleýmettik-ekonomıkalyq jetistikterin baılanystyramyz.
Qazaqstan osy saılaý barysynda óziniń fenomeni nede ekendigin kórsetti. Ol halyqtyń Prezıdentke ózara jáne tolyq senim men qurmettiń nyq ornyqqanynda. Elimizdiń árbir turǵynynyń óziniń ómirinde Prezıdenttiń róli men orny jóninde dara pikiri qalyptasqan. Men úshin Nursultan Nazarbaev – ekonomıkalyq jáne áleýmettik qaıta qurýlardy júzege asyrǵan, adamnyń laıyqty ómir súrýine irgetas qalaǵan aqyldy adam. Biz dereksiz saıası nemese ekonomıkalyq qaǵıdalarǵa emes, naqty adamnyń ómir súrý deńgeıin jaqsartqan bılik úshin daýys berdik.
Qazaqstan – baısaldy, qonaqjaı, dinı turǵyda tózimdi, ekonomıkalyq jáne áleýmettik turaqtylyq uıyǵan memleket. «Qazaqstan» atty alyp kememiz órkendi bolashaqqa senimdi baǵytynan aýytqymasyn deımiz.
Erkebulan ILIIаSULY, «Alageum Electric» AQ EMB bas dırektorynyń orynbasary.
Ońtústik Qazaqstan oblysy.