Son IL-GÝK: «Kórermenniń yqylasyna tánti boldym»

Bıyl «Koreıanyń Qazaqstandaǵy jylyna» oraı, atalǵan eldiń Mádenıet, sport jáne týrızm birinshi vıse-mınıstri Mo Chhol-Mın bastaǵan delegasııanyń Astanaǵa arnaıy kelgenin buǵan deıin habarlaǵan bolatynbyz. «Koreıanyń Qazaqstandaǵy aptalyǵy» festıvaline qatysý úshin at arytyp jetken qonaqtardyń arasynda Koreıanyń belgili óner adamdary men ujymdary bar ekenin de aıtqan edik. Solardyń biri «Hanzada Jýmong» serıaly arqyly kóptiń yqalasy men qoshemetine bólengen belgili akter Son Il-Gýk. Astanada Koreıa delegasııasymen bolǵan baspasóz máslıhatynan keıin ońtústik­koreıa­lyq aktermen áńgimelesýdiń sáti túsken edi. – Siz bala kezińizde akter bolǵyńyz kelmepti. Alaıda, ýaqyt óte kele osy joldy tań­dapsyz. Nege? – Iá, men bala kezimde dızaıner bolýdy armandadym. Alaıda, sol mamandyq boıynsha ýnıversıtetke oqýǵa túse almadym. Sosyn meniń tanystarym basqa kásipti tańdaýǵa keńes berdi. Máselen, sahnadaǵy ónerge baı­lanysty. Al sahnadaǵy óner akterlik mamandyqqa tikeleı qa­tysty ekenin bilesiz. Sol sebepti, men aqyr sońynda teatr fakýltetine oqýǵa tústim. Mine, meniń akterlik jolym osylaı bastaldy. – Kópshilikke tanys «Teńiz ámirshisi» serıalynan keıin baryp, «Hanzada Jýmong» serıalyna shaqyrtý alypsyz. Iаǵnı, áýeli «Teńiz ámirshisi» serıaly arqyly tanymal bolǵan ekensiz. Bul serıalǵa túsýge qalaı keldińiz? – Jalpy alǵanda, meniń «Teńiz ámirshisi» degen serıal arqyly tanymal bola basta­ǵa­nym ras. Sol kezde otbasymyzda da túrli qıynshylyqtar bolǵan edi. Osy serıaldan keıin ma­terıaldyq jaǵdaıymyz da tú­zeldi. Sondyqtan, «Teńiz ámir­shisi» degen serıal men úshin ys­tyq. «Teńiz ámirshisi» se­rıa­lyn­daǵy He Shınniń rólinde bas­tapqyda basqa akter oınaýy kerek bolatyn. Alaıda, ol akter­diń basyndaǵy belgili bir jaǵ­daı men sebepke baılanysty meni shaqyrtty. О́zińiz biletin shyǵarsyz, bul serıaldaǵy He Shın – jaǵymsyz keıipker. Onyń ústine ol serıaldaǵy bas­ty keıipker emes. Alaıda, soǵan qaramastan, meni kórer­menderdiń basym kópshiligi jaq­sy kórip ketti. Negizinen men kó­bi­nese jaǵymsyz keıipker­lerdiń rólinde kóbirek oınappyn. – Al «Hanzada Jýmong» serıalyna túsýge arnaıy usynys bildirildi me? – Tarıhta Hanzada Jýmong – jan-jaqqa tarap, bytyrap ketken taıpalardyń basyn qosyp, adamdardyń júregine úmit otyn uıalatqan, sóıtip, uly Kogýre, ıaǵnı Koreıa memleketiniń negizin qalaǵan belgili tulǵa. Son­dyqtan, serıalǵa túsýge usynys túskende qatty qýandym. Usynysty birden qabyldadym. – Qazirgi tańda qandaı kıno­larǵa túsip júrsiz? Teatr sah­na­synda da oınaısyz ba? – Jaqynda ǵana bir krımı­nal­dyq serıaldyń túsirilimi aıaq­taldy. Al mamyrdyń ortasyna qaraı, bir spektaklde oına­maq­pyn. Bul spektakl Koreıanyń táýelsizdigi jolynda kúresken bir qaıratkerdiń basynan keshkenderi týraly. Budan keıin de birqatar kınolarǵa túsýdi kózdep otyr­myn. Ol kınolardyń ataýlary qan­daı ekenin ázirge aıta almaımyn. – Koreıa kınoındýstrııa­sy­nyń ózine tán ózgesheligi men kıno túsirý úderisindegi ereksheligi týraly ne aıtasyz? – Meniń biletinim, Japonııa men Amerıkada ádette kınony tu­tastaı túsiredi, sosyn mon­taj­daıdy. Ekranǵa sodan keıin jiberedi. Al Koreıada serıaldyń al­dy­men 20-30 paıyzy túsiriledi. Montajdalady. Ekranǵa jiberiledi. Biz sol arqyly kórermenniń «reaksııasyn» baıqaımyz. Se­rıal­dyń qalǵan bóliginde kórer­menniń kózqarasyna qarap oty­ryp, kınoǵa ózgeris engizemiz. Koreıa kınolarynyń Qazaqstanda keńinen tanymal bolýynyń syry osynda jatsa kerek. Menińshe, bizdiń serıaldarymyzdyń basty artyqshylyǵy osy. Ekinshiden, koreı serıaldary kóbinese jeke kapıtal qarajatyna túsiriledi. Memlekettik bıýdjet qarajaty­men túsiriletin serıaldar az. – Al ózińiz prodıýser bolyp, kıno túsirý oıyńyzda joq pa? – Joq. Men aktermin. – Bolashaqta Qazaqstanmen birlesken kınoǵa túsý oıy­ńyz­da bar ma? – Árıne, eger múmkindik bo­lyp jatsa, qýana-qýana túser edim. – Siz ózińizdiń jasyńyzdan anaǵurlym jas kórinesiz. О́zi­ńizdiń keskin-kelbetińizdi, syrt­qy pishinińizdi jaqsy saqtap turý úshin ne isteısiz? Maman­dyǵyńyz da kúrdeli ǵoı. – Eń aldymen, alkogoldik ishim­dikterdi ishpeımin. Temeki shek­peımin. Meniń syrtqy pishi­nim­niń jastyǵy salamatty ómir saltyn ustanýymnan ǵoı dep oı­laımyn. Ekinshiden, men kókónis ónimderi men jemis-jıdekterdi ǵana jeımin. Al et ónimderin jemeımin. 10 jyldyń júzi boldy. Osydan birer kún buryn maǵan káýap ázirlep qoıypty. Álgini kórip, qatty jegim kelgeni-aı. Úshin­shiden, men sportpen shuǵyl­danǵandy jaqsy kóre­min. Onyń ishinde trıatlondy una­ta­myn. Tór­tinshiden, árdaıym tek jaqsy nárseler týraly oılaýǵa tyry­samyn. Bir sózben aıtqanda, optımıspin. – Astanaǵa kelgende 500-ge tarta kórermenińizben kezdesip, olarǵa qoltańba berge­ni­ńizdi bilemiz. О́zińizdiń Qazaq­stan­da tanymal ekenińizdi bilgende qandaı sezimde boldyńyz? – Meni jaqsy kóredi eken. Tipti men oılaǵannan da asyp tústi. О́tken jyly Qazaqstan Prezıdenti Nursultan Nazar­baev­tyń Koreıaǵa jasaǵan sapa­ry­na oraılastyrylǵan qabyl­daý­da boldym. Bul – akter úshin qurmet. Sebebi, akter kópshilik arasynda tanymal bolmasa, ony mundaı qabyldaýlarǵa shaqyr­maı­dy ǵoı. Sol kezde men Qazaq­stan jurty­nyń maǵan degen yqy­lasy jaqsy ekenin estip qalǵan edim. Al Asta­naǵa kelgende kórermenniń maǵan degen yqylasynyń shyna­ıy ekenine kózim jetti. Astananyń baza­ry­na barǵanda da osyndaı yqy­las­ty baıqadym. Meni birden ta­nyp, «Jýmong, Jýmong» dep jat­qandary da boldy. Mende ba­syn­da bazarǵa barý degen oı bolmaǵan edi. Alaıda, bazardyń janynan ótip bara jatyp, neshe túrli kóz tartar kókónis pen jemis-jıdekterdi kórip, eriksiz aıaldadym. Taǵy bir aıtatynym, meniń Koreıada bir dosym bar. Qazaq­stannan. Esimi – Áıgerim Aıdarova. Ol meni Qazaqstan Prezıdentimen kezdesý kezinde qazaq tilinde sálemdesýdi úıretti. Son­daı-aq, qazaq jerine bar­ǵanda orys tilinde emes, qazaq tilinde sóıleýge keńes berdi. Sondyqtan, men qazaq tilin azdap úırenip júrmin. – Sizdiń zaıybyńyz sýdıa eken. О́ner adamy men sýdıa qa­laı kezdesip júr? Otba­sy­ńyz­dyń qandaı bolǵanyn qalaısyz? – Bizdi siz sekildi jýrnalıster tanystyrdy. Sodan keıin ekeýmiz kezdesip júrdik. Keıin, bir jarym jyldan keıin úılen­dik. Árıne, men balalarymnyń kóp bolǵanyn qalaımyn. Biraq ázirge balamyz joq. – Estýimshe, sizdiń arǵy atańyz general bolypty. Mu­nyń sizdiń ómirińizge qan­daı da bir áseri boldy ma? – Iá, meniń atam – Koreıa tarıhyndaǵy belgili adam. HH ǵasyrdyń basyndaǵy táýelsizdik jolyndaǵy qozǵalystyń basyn­da turǵan, japon basqyn­shy­laryna qarsy kúresken general Kım Chja Chjınniń shóberesimin. Ol týraly derekti fılmder tú­sirilgen, tarıh páni oqýlyq­ta­rynda da uly atam týraly máli­metter kezdesedi. Al anam aktrısa bolǵan. Qazir saıasatpen aınalysady. Depýtat. Al jalpy alǵanda, tekti tulǵanyń urpaǵy bolý, tarıhta aty qalǵan jan­nyń shóberesi bolý maǵan úlken jaýapkershilik júkteıdi. Áńgimelesken Láıla EDILQYZY.