«Baqsaı» keńsharynyń atynan jyr dodasyna túsken Jánıba aqyn talaı báıgede shashasyna shań juqtyrmady. Alǵashqy respýblıkalyq aıtysqa barǵanynyń ózi bir hıkaıa. «Alaman aıtys ótedi» degen habar taraǵanymen, Atyraý óńirinen eshkimniń sýyrylyp shyqpaǵany aqyn qyzdyń namysyna tıedi. Báıge dese shyn júıriktiń arqasy qozady emes pe? Aýdannan da, oblystan da qoldaý bolmaǵasyn, dombyrasyn arqalap jaıaý jolǵa shyǵady. Aýylynan aýdan ortalyǵyna jetýdiń ózi muń kez. Sý tasıtyn kólikke ázer dep aıaǵyn iliktiredi, sol jol Jánıbany arý Almatynyń tórinen bir-aq shyǵardy. Ár óńirdiń eń myqty aqyndary jınalǵan aıtysta alǵashqy qarsylasy Soltústik Qazaqstan oblysynan kelgen Keńes Tynymbaev bolǵanyn qazir saǵynyshpen eske alady. Aýyl arasyndaǵy aıtys aıtys pa, naǵyz doda osynda eken. Teledıdar arqyly tamashalap otyrǵan atyraýlyqtar Jánıbanyń sýyryp salma sóz tapqyshtyǵyna rıza bolyp, el bolyp qýanǵan desedi.
Odan keıin de myqtymyn degen talaı aqynmen aıtysty. Jeńdi, jeńildi, biraq jasyǵan da, tasyǵan da joq. Respýblıkalyq sýyrypsalma aqyndar aıtysynda, «Halyq talanttary» televızııalyq festıvalinde júldeger atandy. El ony «Atyraý oblysynyń №1 aıtys aqyny» dep abyroı bıigine kóterdi. Shaıyr ekenmin dep sharyqtap taǵy ketpedi. Sol aýylynda shańyraq kóterip, ónegeli kelin, asyl jar, aıaýly ana boldy. Birneshe poezııalyq, prozalyq jınaq shyǵardy. Aýyldaǵy talantty balalarǵa ustazdyq etti.
Qazaqstan Jazýshylar Odaǵynyń múshesi, Mahambet aýdanynyń qurmetti azamaty Jánıba Qarasaeva úshin bıyl mereıli jyl. 70-ke tolǵan aqynyn ardaqtaǵan aýdan ákimdigi «Júregi jyrdan jaralǵan» atty shyǵarmashylyq kesh ótkizip, syı-qurmet kórsetti. Aýdan ákiminiń orynbasary Ulyqbek Tinálıev, Jazýshylar Odaǵy Atyraý oblystyq bólimshesiniń tóraǵasy Qoıshyǵul Jylqyshıev, óńirdiń zııaly qaýymy aqyn keshinde sóz alyp, tilektestik tanytty.
Baqytgúl BABASh,
«Egemen Qazaqstan».
ATYRAÝ.