Tusaýkeserge arnaıy qatysqan Almaty qalalyq sot tóraǵasy Aqjan Eshtaı úzdik ýnıversıtette atalmysh aýdıtorııanyń ashylýy asa mańyzdy jańalyq ekenin atap ótti. Endigi kúni sabaq ýaqytynda stýdentter arnaıy jabdyqtalǵan sot otyrysy zalynda tájirıbe jınaqtaı alady.
QazUÝ zań fakýltetiniń dekany Dáýlet Baıdildınovtyń pikirinshe, oqý aýdıtorııasy stýdentterdiń sot isin júrgizý jumysyna qatysyp, onyń mańyzdylyǵyn túsinýge, alyp otyrǵan bilim sapasyn odan ári arttyrýǵa septigin tıgizedi. Sot organdarynyń qyzmetkerleri, prokýratýra, advokatýra, medıator jáne basqa da tájirıbeli mamandar sot otyrysynyń oqý zalynda tájirıbe sabaqtaryn júrgizetin bolady.
Rektorat zalynda ótken stýdenttermen kezdesýdi QazUÝ-dyń áleýmettik damý jónindegi prorektory Sholpan Jamanbalaeva ashyp, «Ult Josparyn» iske asyrý aıasynda ýnıversıtetke kelip, sot júıesin reformalandyrý jaıly stýdentterge arnaıy dáris oqyǵany úshin Almaty qalalyq sot tóraǵasy Aqjan Jaılaýhanulyna alǵysyn bildire kele, zańger stýdentterdiń jańa aýdıtorııada teorııalyq bilimderin shyńdap, sottyń rıtorıkalyq daǵdylaryn úırenetindigin tilge tıek etti.
Aqjan Eshtaı stýdentter men ustazdarǵa dáris oqý barysynda ekinshi ınstıtýsıonaldyq reforma aıasynda sot júıesine bekitilgen 10 arnaýly qadamnyń oryndalýy, jańa zańnama sharttary boıynsha úsh satyly sot júıesi týraly, Sot tóreligi akademııasynyń paıda bolýy, alqabıler sot ınstıtýty qyzmetininiń sheńberin keńeıtý jaıyna toqtaldy. Sonymen qatar, stýdentterge arnap sot qyzmeti jáne zańnamalyq ózgertýler men tolyqtyrýlar týraly beınerolıkter kórsetildi.
Kezdesýge qatysqan Almaty qalalyq sotynyń appelıasııalyq sot kollegııasynyń azamattyq ister jónindegi tóraǵasy Baqyt Málik-tegi Elbasy Nursultan Nazarbaevtyń «100 naqty qadam» josparynda belgilengen tapsyrmalar men mindetterine sáıkes jańadan qabyldanǵan Azamattyq is júrgizý kodeksiniń normalaryna toqtaldy. Ol Kodeks quqyqtyq turǵyda áleýmettik qaıshylyqtar men qoǵamdyq kelisimdi saqtap qalýǵa baǵyttalǵandyǵyn atap ótti.
Kezdesý sońynda qonaqtar stýdentterdiń san túrli saýaldaryna jaýap berip, «Qazaqstannyń sot reformasy: Keshe. Búgin. Erteń» atty kitapty syıǵa tartty.
Mıra BAIBEK,
«Egemen Qazaqstan»
ALMATY