Djeıms Komı Donald Tramptyń saılaý aldy shtabynyń Reseımen múmkin bolǵan baılanystaryn tergeý jumystaryna jetekshilik etken. AQSh prezıdentiniń Djeıms Komıge joldaǵan hatynda onyń eldiń jetekshi quqyq qorǵaý vedomstvosyn «tıimdi basqara almaıtyny» aıtylǵan. Budan buryn Hılları Klınton prezıdent saılaýynda jeńiliske ushyraýyna FTB basshysyn kinálaǵan bolatyn. 3 mamyrda AQSh senatynyń zań komıtetine jaýap berý kezinde Djeıms Komı Klıntonnyń kómekshisi Hýma Abedınniń óz kúıeýine «myńdaǵan» elektrondy hat joldaǵanyn, olardyń arasynda qupııa aqparattar bolǵanyn alǵa tartty. Alaıda, bir aptadan keıin FTB Abedınniń ondaı kólemde hat jibermegenin, tek eki tizbek hat joldaǵanyn moıyndady. Onyń poshtasynan jiberilgen 49 myń hattyń kóbisi telefonnan rezervtik kóshirme jasaý nátıjesinde paıda bolǵan. AQSh prezıdenti men Ádilet mınıstrligi málimdegendeı, Djeıms Komıdiń qyzmetinen bosatylýyna onyń Hılları Klıntonnyń jeke poshtasyna qatysty daýdy durys tergemegeni sebep bolǵan. Alaıda, demokrattar bul máselege qatysty óz ustanymdaryn bildirýde. Olardyń pikirinshe, Hılları Klıntonǵa qatysty daýdyń barlyǵy jaı ǵana kózboıaýshylyq. «Bul áreket arqyly Tramp komandasynyń Reseımen aradaǵy baılanysyna qatysty tergeýdi toqtatý kózdelip otyr», – deıdi demokrattar.
AQSh prezıdenti Donald Tramp Federaldyq tergeý bıýrosynyń dırektory Djeıms Komıdi qyzmetinen bosatty. Aq úıdiń málimdeýinshe, prezıdent bul sheshimdi bas prokýror Djeff Seshnsa men onyń orynbasary Rod Rozenstınniń keńesine súıenip qabyldaǵan.