Jalpy, «QazMunaıGaz» kompanııalar tobyna qaraıtyn munaı óńdeıtin pavlodarlyq alyp kásiporynnyń jańǵyrtý jumystary 2016 jyly aıaqtalýy kerek-ti. Biraq, PMHZ-nyń jańǵyrtý jumystaryn aıaqtaý shilde aıynan qarasha aıyna aýystyrylypty. – Kásiporynda byltyr tamyz aıynda boldym, − dedi Q.Bozymbaev. – Qazir nátıje baıqalady. Bıyl da jańadan eki qurylǵy nysany salynypty. Shilde aıynda iske qosylady degen oıdamyn. Qurylys alańyna keıbir qurylǵylardyń kesh kelýine oraı úsheýi keshirek qosylady. Qazan aıynyń basynda zaýytqa kúrdeli jóndeý jumystaryn júrgizýge ruqsat beremiz. Sóıtip, 3-4 aıdyń ishinde zaýyt jınaqtalyp qalýy kerek. Elimizge asa qajet áýe otyny shyǵarylatyny óte mańyzdy. Jańǵyrtýdan keıin ónim elimizde 2018 jyldan bastap qoldanylýy tıis K-4 jáne K-5 talaptaryna saı bolady. Eger taǵy da bir ózgeris jasalyp, jańǵyrtý jumystarynyń aıaqtalýyn keshiktirgen jaǵdaıda basshylyq jaýapkershilikke tartylýy múmkin ekendigi de eskertildi. О́ıtkeni, kásiporynnyń jańǵyrtý jobasynyń barysynda 2011-2017 jyldar aralyǵynda Keden odaǵynyń tehnıkalyq baǵdarlarynyń talaptaryna saı K4 ekologııalyq dárejedegi motor otynyn shyǵarýy kózdelgen. Jańǵyrtý jumystary aıaqtalǵan soń, zaýytta ekologııalyq talaptarǵa saı kelmeıtin AI-80 markaly benzın óńdelmeıdi. Zaýyt jaqyn arada avıaotyn óndirýdi bastaıdy. Ornatylǵan jańa qurylǵylar qurylysy Jet A halyqaralyq standarttaǵy áýe tasymalyna qajetti otyn shyǵarýǵa múmkindik beredi. Kásiporynda 6 mıl- lıon tonnadaı munaı óńdeledi. Zaýytqa elimizdegi munaı óńdeıtin 3 zaýyttyń munaı ónimderiniń jalpy jyldyq kóleminiń 30 paıyzy tıesili. Jańǵyrtý jumystarynan soń munaı óńdeý qýattylyǵy 6,5 mıllıon tonnaǵa kóbeımek. «PMHZ» JShS bas dırektory Shýhrat Danbaı mınıstrge kásiporyndaǵy jańa tehnologııalyq keshenderdegi joǵary oktandy suıyq benzındi saqtaý qoımasyn jáne avtomattandyrylǵan benzın aralastyrý stansasyn, kúkirt óndirý sııaqty basqa da qondyrǵylardaǵy qurylys-montajdaý jumystarynyń aıaqtalǵany jaıynda baıandady. Bul nysandardaǵy kúkirt óndirý qondyrǵysy shilde aıynda, al ızomerleý jáne nafta splıtteri qondyrǵysy qyrkúıekte aıaqtalady dep josparlanǵan. Qazir nysandardy iske qosýǵa arnaıy daıyndaý, ázirlik jumystary júrgizilýde. Zaýyt mamandary jańǵyrtý jumystary aıaqtalǵannan keıin joǵary oktandy K4 kólik janar-jaǵarmaıyn óndirý kólemi 297 myń tonnaǵa deıin artady dep otyr. Mınıstr zaýyt jumysshylaryn, munaı óńdeýshilerdi óndiristegi energııanyń jumsalýy men tehnologııalyq shyǵyndardy azaıtýǵa shaqyrdy. Eń bastysy, Reseıden keletin munaıdyń sapasyna mán berýdi tapsyrdy. Jalpy ınvestısııalyq jańǵyrtý jobasynyń quny 212,3 mlrd teńgeni quraıdy. Jobalaý, qural-jabdyqtardy jetkizý jáne qurylys jumystary «QazMunaıGaz» UK» AQ pen «Qazaqstan damý banki» AQ-tyń qaryz qarajaty esebinen, sondaı-aq, «PMHZ» JShS-niń óz qarajaty esebinen qarjylandyrylady. Joba boıynsha merdigerler – Rominserv S.R.L. kompanııasy – «QMG» UK» AQ quramyna kiretin KMG International N.V. rýmyn munaı kompanııasynyń enshiles bólimshesi, sondaı-aq, qytaılyq NFC kompanııasy.
Farıda Byqaı, «Egemen Qazaqstan» Pavlodar
Sýretti túsirgen Valerıı BÝGAEV