Álem kýbogy – aýylda!

Aýla jarysynan Olım­pıada jarysyna deıin ótip jatatyn básekelerdiń nebir qudirettilerin kórip, kýá bol­ǵan basymyz bar. Odan beri túser bolsaq, álem chempıona­ty, Azııa, Eýropa chempıonat­tary, Álem kýbogy... Ol jarystar álemniń nebir jaly kúdireıgen megapolıs qalalarynda ótip júr – London, Parıj, Nıý-Iork, Máskeý, Astana... Al, qazaq kúresinen kezekti Álem kýbo­gynyń bá­sekesi aýylda ótedi. Bul ǵa­jap oqı­ǵany ómirge ákelip otyrǵandar – Dúnıejúzilik qazaq kúresi federasııasy! Aıtsa senbeı­siz, bul jarys 26-28 mamyr aralyǵynda Shyǵys Qazaq­stan oblysy, Tarbaǵataı aýda­nynyń Aqsýat kentinde ótedi! Jarysqa Qazaqstannan ózge 25 memlekettiń sportshylary shaqyrylyp, olar kelisimin berip, qatysqaly otyr. «Bul Qazaqstan Táýel­siz­diginiń 25 jyldyǵy aıa­syn­da ótkeli otyrǵan jarys, sondyqtan da jary­s­qa 25 memlekettiń balýan­da­­ryn shaqyrdyq!», deı­di fe­derasııanyń jaýapty qyzmetkerleri. Tamasha oı, tamasha joba, tamasha tartý!  Jaqynda qolyma osy ja­rysqa arnaıy shyǵarylǵan túrli-tústi baǵdarlama-kitapsha tústi. Shyǵys Qazaqstan obly­synyń ákimi D. Ahmetov, Máde­nıet jáne sport mınıstri A.Muhamedıuly, Dúnıejúzilik qazaq kúresi federasııasynyń prezıdenti I.Ábishev myrzalar osy jarysqa sáttilik tilep, sóz arnaǵan eken. Álem kýbogynyń aýylda ótetininiń halyqtyq mańyzy osy jerde basa aıtylǵanyna kóz jetti. «Kezinde eline, ultyna qyzmet etken Yrǵyzbaı áýlıe júldesi úshin ótkeli otyrǵan bul Álem kýbogy jolyndaǵy jarys elimizde Elbasy alǵa qoıyp otyrǵan buqaralyq sportty keńinen órkendetý jolyndaǵy jumystardy barynsha jandandyrady» – dep atap ótedi D.Ahmetov.  «Jyl saıyn qazaq kúresinen Yrǵyzbaı Doshanauly júldesi úshin ótetin halyqaralyq jarys elimizde ulttyq sportty órkendetýge ólsheýsiz úles qosyp keledi!» – deıdi A.Mu­hamedıuly. «Mundaı alqaly jarys ótkizgeli otyrǵan Shyǵys Qazaqstan oblysy tek eńbekkerler, fılosoftar, aqyndar aımaǵy ǵana emes, elimizdiń sporttyq dańqyn asyryp, álem, Olımpıada chempıondaryn ósirgen ólke!» – dep atap ótedi I. Ábishev.  Osy jarysty aýylda ótkizý jobasynyń avtory, Dú­­nıejúzilik qazaq kú­resi fe­derasııasynyń vıse-pre­zıdenti Bedelhan Kamalhanuly bylaı deıdi: «Aty men istegen eldik isi búkil Qazaqstanǵa belgili Yr­ǵyzbaı Doshanauly júl­desi úshin ótetin bul Álem kýbogynyń mańyzy – shetten keletin qonaqtarǵa eldi, jerdi kórsetý, jer ján­­­­­naty Tarbaǵataıdy aralatý. Bul bizdiń týrızmdegi múmkindigimizdi de pash etý!». Al kezdesip, suhbat­tas­qanda Dúnıejúzilik kúres federa­sııasynyń atqarýshy dırektory Talǵat Mázibaev inimiz mańyzdy eki oı aıtty. Birinshi, Qazaqstan Táýel­sizdiginiń 25 jyl­dyǵyn biz osy jyl kóle­minde de tý etip ustasaq nur ústine nur! Ekin­shi, Álem kýbogy sekildi jarysty aýylǵa tartyp jat­saq, onyń da mańyzdy sebebi bar – biz sporttaǵy el namy­syn qor­ǵaıtyn ul men qyz­dy aýyldan izdep, aýyldan tárbıelesek, odan kem bolmaı­myz. Qajymuqan babamyz da, Ǵusman Qosanov, Ámın Tuıa­qov, Ábdisalan Nurma­qanov, Ábil­seıit Aıhanov ata­­lary­myz da, Jaqsylyq Úsh­kem­pirov aǵamyz da aýyldan shyqqan!». Álem kýbogy jarysynyń aýylda ótýi ǵajap oqıǵa. Ári bul jarys Búkilálemdik kúres federasııasynyń kúntizbesine engen jarys. Ári, jarysqa qatysatyn balýandar arasyn­da kúrestiń ár túrinen álem, Olımpıada chempıondary keledi dep kútilýde. Olaı bolsa, aýylda ótetin Álem kýbogy jarysynyń joly ashyq bolǵaı! 

Nesip JÚNISBAEV, jýrnalıst, Qazaqstannyń eńbek sińirgen qaıratkeri