«Aımaqtyń barlyq ónerpazdaryn aldaǵy mádenıet jáne óner qyzmetkerleri kúnimen quttyqtaımyn. Osy mereke qarsańynda aksııanyń qorytyndysyn shyǵarýdy jón kórdik», dep óziniń quttyqtaýyn jetkizgen oblystyq mádenıet, muraǵattar jáne qujattama basqarmasynyń basshysy Azamat Muhamedchınov óńirdiń birneshe ónerpazyna oblys ákiminiń syılyqtaryn tabys etti. Abaı aýdandyq mádenıet, tilderdi damytý, dene shynyqtyrý jáne sport bólimi basshysynyń orynbasary Eldar Orazalın «Ádebıet isi», Semeıdegi Ámire Qashaýbaev atyndaǵy oblystyq fılarmonııanyń kórkemdik jetekshisi Qadylbek Omarov «Úzdik mýzyka óneri», oblystyq tarıhı-ólketaný murajaıynyń qyzmetkeri Sergeı Starkov «Murajaı isi», Tarbaǵataı aýdany Aqsýat aýylyndaǵy mádenıet úıiniń dırektory Sháken Kópshikpaeva «Úzdik klýb isi» atalymdary boıynsha marapattalyp, 200 myń teńgelik sertıfıkatty ıelendi. Bul kúni qolymen emes, qylqalamdy ıeginde ustap turatyn arnaıy qondyrǵynyń kómegimen sýret salatyn óskemendik qylqalam sheberi Sergeı Elıseev «Beıneleý óneri» atalymy boıynsha úzdik dep tanyldy. Búginde 60-qa jýyq kartına avtorynyń sýretteriniń deni − peızaj janrynda. «Bul syılyq – ulymyz úshin úlken qýanysh. Syıaqynyń qarjysyn birinshi kezekte onyń shyǵarmashylyq qabiletin odan ári shyńdaýǵa jumsaıtyn bolamyz», deıdi sýretshiniń ákesi Valerıı Elıseev. Atalmysh sharanyń qorytyndysy boıynsha Jarma aýdany bas júldeni enshilep, «Týǵan el – altyn besigim» aksııasynyń aýyspaly óner kýbogyn osymen toǵyzynshy jyl qatarynan ıelendi.
Azamat QASYM, «Egemen Qazaqstan»
О́SKEMEN