Ata Zań ulyqtalǵan kesh

Qazaq úshin baǵa jetpes eń basty qundylyq el Táýelsizdigi desek, osy oıdy ár azamattyń kókiregine sha­shaýsyz shegelegen memlekettiń mereıli qujaty – Konstıtýsııanyń or­ny qashanda bıikten saılanýy jara­symdy. Dala tirshiliginiń órbýine ózek bolǵan Ata Zańdy asqaq rýhpen aspandatqan dýmandy kesh shymyl­dy­ǵynyń Táttimbet atyndaǵy akade­mııalyq qazaq ult aspaptar orkes­triniń oryndaýyndaǵy Nurǵısa Ti­len­dıevtiń «Mahambet» sımfonııa­lyq kúıimen ashylýynyń ózinde úl­ken mán bar. Dál búgin qazaqtyń keń dalasy azattyq ańsap ótken sol bu­rynǵy Mahambet syndy narkesken babalardyń únin qaıta jańǵyrtyp, eldik pen birliktiń týyn tiktep jat­qanyn naqyshty boıaýymen qapysyz bederlegen kúı qudireti erekshe áser­lendiredi. Keshegi saz ben búgingi ur­paqtyń tyń saryny qatar órile kelip, boıdy serper sezim bıleıdi. Osy shalqyma kúıdiń sońynan M.Maqataevtyń sózine jazylǵan T.Ra­qymovtyń «Qazaǵym-aı» ánin Erkin Shúkimanovtyń oryndap shyqqany kúlli tyńdarmandy kúmis kómeı ún­niń sıqyryna bólep tastady. K.Baıseıitova atyndaǵy Ulttyq opera já­ne balet teatrynyń trýppasy myń buralyp «Aıjan qyzdy» bılegende jazıra dala kók kilemin qulpyra jaıyp tastaǵandaı kelisti keste órnek tókti. Artynsha Saryarqanyń sazy saıyn beldi qýalap, keshegi kúnnen bir ún tirilip til qatqandaı edi. Ol Bolat Esimhanov oryndaǵan Mádıdiń el arasyna keń taraǵan «Qarakesek» áni bolatyn. Jeke oryn­daýshynyń daýysyna B.Baı­qadamov atyndaǵy akademııalyq kapella men astanalyq opera jáne balet teatrynyń hory qosyla óń bergende, bul shyǵarma tipti úlken sahnada oryndalatyn klassıkalyq injý-marjanǵa uqsap ketkeni shyndyq. «Dala sazy» dep atalatyn án toptamasy qulaqtyń qurysh etin qandyrar tátti áýezdermen sýsyn­datyp, qazaqtyń halyq ánderin Bı­bigúl Saýytova, Anar Qumarova, Gúl­dana Noǵaıbaeva, Venara Qar­jaý­baeva, Gúlim Alshynova naz toly naqyshpen nárlendirdi. Jas oryndaýshylar Narul Toıkenov pen Emıl Erǵalı Qazaqstan kompozıtorlarynyń ánderinen top­ta­many usynsa, ile-shala orkestr Túrkeshtiń «Kóńil asharymen» óz ónerin qorytyndylap shyqty. I.Shtraýstyń «Jarqanat» operet­ta­synan Adeldiń shýmaqtaryn K.Baıseıitova atyndaǵy Ulttyq opera jáne balet teatry sımfonııalyq orkestriniń (dırıjeri – Aıdar Áb­jaqanov) súıemeldeýimen oryndaǵan Mádına Islamovanyń, A.Jubanov atyndaǵy respýblıkalyq mýzyka mektebiniń «Aq tilek» balalar horymen birge G.Podelskıı men I.Nazalevıchtiń «Lıýblıý tebıa, moı kraı rodnoı» ánimen shyqqan KSRO halyq ártisi Álibek Dinishevtiń, áskerı ánderden popýrrı usynǵan Medeý Arynbaev, Aıqyn jáne Rús­tem Nurjigittiń óneri kesh aja­ryna kóterińki lep bergendeı. N.Nazarbaev pen A.Qorazbaevtyń «Saryarqa» ánin Stepanıda Basıýk, Natalıa Kochkına, Andreı Tregýbenko men Igor Blagodarnyı ózindik talǵammen óńdelgen úlgide pash etti. Estrada ánshisi Dilnaz Ahmadıeva bastap shyqqan jastar toby I.Grıbýlınanyń «Astanasyn», Dáýlet, Jasulan men Baqytjan syndy jasóspirim órender «Aq tilek» pen «Eligaı» balalar horymen  birge Á.Ysqaq pen A.Ahmetbekulynyń «Kók týdyń jelbiregeni» ánin, Azamat Jyltyrkózov, Baýyrjan Ándir­janov pen Andreı Tregýbenko Q.Júnisovtiń «Egemen Qazaqstan» ánin patrıottyq rýhta kókke sam­ǵatqanda, Ata Zańnyń qurmetine tógilgen shýaq elorda tórin eńselendirip jibergen. Qarashash TOQSANBAI. Sýretti túsirgen Orynbaı BALMURAT.