Qazaqstan halqy assambleıasy oblystyq fılıaly janyndaǵy analar keńesi órtten zardap shekken jas Bazarovtar otbasyna jańadan úı satyp alyp berdi.
Bıyl qazan aıynyń aıaǵynda Qostanaı aýdanynyń Polovnıkov selosynda turatyn Bazarov Erboldyń úıi elektr jelisiniń tuıyqtalýynan órtenip ketken bolatyn. Búginge deıin jas otbasy tórt balasymen kórshisiniń úıin panalap keldi.
Osy habardy muǵalimder qaýymynan estigen soń Qazaqstan halqy assambleıasy oblystyq fılıalynyń janyndaǵy analar keńesi qarap otyrýdy jón kórmepti. Sebebi, О́zbekstannan qonys aýdarǵan oralman otbasynyń oblysta jaqyn týystary joq. Erbol mektepte matematıkadan sabaq beredi, úsh balasy jáne balalar úıinen asyrap alǵan taǵy bir qyzy bar. «Eń birinshi bizge A.Baıtursynov atyndaǵy Qostanaı memlekettik ýnıversıtetiniń rektory Huseıin Valeev jáne osy bilim ordasyndaǵy ustazdar qaýymy kómek qolyn sozdy. Olar arnaıy shotqa bir aýyz sózge kelmesten bir kúndik jalaqylaryn aýdardy. Bul qaıyrymdylyq isten stýdentter keńesi de syrt qalmady, barlyǵy 1,5 mıllıon teńge jınaldy. Bul qarjy úıi órtenip dalada qalǵan otbasyǵa jańa úı ǵana emes jáne jıhaz satyp alýǵa da jetti», – dedi analar keńesiniń tóraıymy Shýshanık Sarkısıan.
«Adamdardyń qaıyrymdylyǵynan asqan qasıetti dúnıe joqtyǵyna kózim jetip tur. О́zimniń aılyq jalaqyma mundaı úı satyp ala almas edik. Qystyń kózi qyraýda ne isterimizdi bilmeı, ańtarylǵan jaıymyz bar edi. Bizge kómek qolyn sozǵan qaıyrymdy jandardyń barlyǵyna alǵysym sheksiz», – dedi Erbol Bazarov.
Sonymen qatar, oblystyq Dostyq úıiniń ókilderi jas, kóp balaly otbasyna syılyqtar jáne Qostanaı qalasyndaǵy №24 «a» bastaýysh mektebiniń oqýshylary salyp berip jibergen sýretterdi tapsyrdy.
Názıra Járimbetova,
«Egemen Qazaqstan»